Kwayedza
SHANJE dzinobaka semoto dzakaparira mumwe murume wekuChitungwiza, uyo akatongerwa nedare kugara mujeri mushure mekubatwa nemhosva yekuparadza midziyo yeshamwarikadzi yakamuramba iyo yave kudanana nechimwe chikomba.
Kenneth Fore (37), wepanhamba 670 St Mary’s, kuChitungwiza, anonzi aidanana naConfidence Zvotowenga (29), uyo anogara pa1257 St Marys, kuChitungwiza kwakare.
Fore akamiswa pamberi pemutongi Lazarus Murendo weChitungwiza Magistrate’s Courts, akabatwa nemhosva mbiri dzinoti yemhirizhonga neyekuparadza midziyo yemuridzi.
Dare rakaziviswa kuti nomusi wa25 Gunyana gore rino munguva dzemangwanani, vaviri ava vakatadza kunzwisisana nepamusaka pekuti Fore aive nefungidziro yekuti mudiwa wake ainge odanana nemumwe murume.
Zvotowenga anonzi akazoudza Fore kuti ave kufinhikana naye nokudaro aida kuti vachirambana.
Izvi zvinonzi hanzvina kufadza Fore achibva atanga kupwanya midziyo yaZvotowenga iyo yaisanganisira mubhedha.
Midziyo yaakaparadza inonzi yaikosha US$120.
“Ini ndaidanana naFore saka pandakamuudza kuti ndakange ndisingachamude ndipo paakapwanya midziyo yangu zvikaita kuti ndimusungise,” akadaro Zvotowenga.
Fore haana kuda kupedzera dare nguva sezvo akabvuma kuti akaparadza midziyo yaZvotowenga mushure mekunge arwadziwa apo akange amuramba uye mukadzi uyu ave kudanana nemumwe murume.
Mutongi Murendo akapa Fore chirango chekugara mujeri kwemwedzi wose icho akazosendeka padivi paine chitsidzo chekuti aifanira kuripira mumhan’ari US$120 musi wa31 Nyamavhuvhu usati wasvika.
Pamhosva yembhirizhonga, akati aifanira kubvisa faindi yeUS$100 uye kukundikana kwake anozoenda kunogara mujeri kwemazuva makumi maviri.
