Kwayedza
Charles Mabika
MUSHURE mekuburitsa mafungiro angu panyanzvi dzeDynamos svondo rapfuura, vaverengi vakada kuti bhora rifambire mberi, tiburitse chikwata chemandorokwati cheHiighlanders kubva gore rachavambwa muna1923 kusvikira 2015. Hevanoi vatambi vacho, vakarongwa inonzi “4-4-2”:
- Goalkeeper: Bruce Grobbelaar.
- Defenders: Mercedes Sibanda, Netsai Moyo, Lawrence Phiri, Douglas Mloyi.
- Midfielders: Tymon Mabaleka, Benjamin Nkonjera, Willard Mashinkila-Khumalo, Madinda Ndlovu.
- Forwards: Adam Ndlovu, Peter Ndlovu.
- Substitutes: Peter “Captain Oxo” Nkomo, Alexander “Cool Ruler” Maseko, Boetie “Stopper” Van As, Barry “Small Engine” Daka, Titus “Zee The Yellowman” Majola (mushakabvu), Tobias “Blaster” Mudyambanje, Majuta “Jujuju” Mpofu (mushakabvu).
- Coach: Bobby Clark.
Hedzinoi nhoroondo dzevatambi 11 vekutanga ava:
Bruce “Jungleman” Grobbelaar: Muchinda uyu aive shuramatongo pakati pemapango. Kusvika nanhasi, pane vaongorori vakawanda vanopika kuti hapasati pava nemumwe goalkeeper akashura mare sa”Jungleman”. Akasvika ku”Bosso” achibva kuDurban City yekuSouth Africa asi akanga atanga basa rake ari muSalisbury Callies (yemuno) ari muUnder-12.
Mercedes “Rambo” Sibanda (mushakabvu): Aiwa, kuti ndikwanise kurondedzera hushasha hwemuchinda uyuka, zvinotoda magwaro nemagwaro ezvake. “Rambo” akanga asingabudike kumashure uye aiti kana onanga mberi achibatsira vatambi vemberi, aiita kubhebha semoto. Kuzoti panyaya yemafree kick, magoalkeeper aihwanda.
Netsai “Super” Moyo: Hakuna vatambi vekumashure vakawanda vaifunga bhora sezvaiita shasha iyi. Aitamba zvakatsetseka, achivhara senamo. Kana “Bosso” yoririma ichienda mberi, “Super Netsai” aigara pachituru chemutyairi. Iye zvino ari kubatsira coach weHighlanders, Bongani Mafu, kuronga chikwata.
Lawrence “Lofty” Phiri: Shuramatongo yekumashure iyi yakanga yakareba kunge twiza! Izvi zvaiita kuti adzorere ma”cross” aiuya mu”penalty box” yake. Kuedza kumupfuura zvaisaita nokuti akanga ari mhondoro chaiyo. Kwemakore akawanda, aive keputeni we”Bosso” uye akazova murairidzi wechikwata ichi kwemakore maviri.
Douglas “British” Mloyi: Vatsigiri vakawanda veHighlanders vanoti kana dai munhu aikanda bhegi resimende kuna “British”, aikwanisa kuridzorera kwaari nemusoro! Kuvhara ari pakati, kumashure muchikwata ichi aive godobori uye aifarirawo kubatsira kumberi, kunyanya pama”corner kicks”.
Tymon “White Horse” Mabaleka (mushakabvu): Muchinda uyu akaita munyama wekuti akatamba panguva imwe cheteyo naGeorge “Mastermind” Shaya weDynamos, izvo zvakamutadzisa kumboitawo “Soccer Star of The Year”. Zita rake remadunhirirwa iri rakabva pakuti aitungamirira chikwata chake pakati penhandare sebhiza remandorokwati.
Benjamin “Makanaky” Nkonjera (mushakabvu): Aitepuka-tepuka seakange aine ma”springs” apo aifamba nebhora mberi. Kusvikira nanhasi, hakuna vakawanda vaitora bhora pasina hurukuro sezvaiitwa na”Makanaky”. Mugore ra1992, akambopihwa bhora na”goalkeeper” wake, Peter Nkomo, ari muchikamu chavo apo vaitamba neBlack Aces muRufaro, ndokubva atsvaira vatambi vanomwe – hongu, vanomwe – achinonwiswa.
Willard “MaWii” Mashinkila-Khumalo: Kunyangwe zvake akanga aine mutumbi muhombe, Willard aimhanya nekushanda zvazviri pakati penhandare. Pakupira vamwe vake aiita sezvinoita derere kana rodzika pahuro! Zvekurovawo mvema kubva pama”free kicks” zvakanga zviri nyore kwaari.
Madinda “Kathazile” Ndlovu: Chamupupuri pakumhanya ndizvo zvaainyanya kudada nazvo . . . kunyangwe ari pakati penhandare kana kurudyi achibatsira vanin’ina vake – Adam naPeter – kuenda mberi. Aiti kana abatidza gwenya rebararamhanya, hapana aikwanisa kuridzima kunze kwake uye airova mambure sezvazviri.
Adam “Adamski” Ndlovu (mushakabvu): Chokwadi pasi harigute. Muchinda uyu aiva nazvo zvose zvinodiwa pamutambi wenhabvu – chimiro, ushamwari, makumbo anokonzera bvongamupopoto mu”penalty box” nekumhanya.
“Adamski” aisaita zvekufungira kwete. Aiziva kwaanenge akananga kana oenda mberi. Asati ashaya mugore ra2012, akanga aumba chikwata cheChicken Inn semurairidzi wacho asi haana kuzokwanisa kusiya apedza basa iri.
Peter “Nsukuzonke” Ndlovu: Nhai vadiwa vaverengi, pane zvandingarondedzere here zvamusingazive pamusoro paPeter? Aiwa, pane mutambi mumwe chete bedzi anonzi ndiye akatsika chikumba kupfuura Peter munyika muno – hanzi ndiGeorge Shaya.
* Svondo rapfuura handina kudoma murairidzi akakunda vose kuDnamos – Sunday “Mhofu” Chidzambwa.
* Svondo rinotevera tichakupai shasha 11 dzeCAPS United kubva yatangwa mugore ra1973.
