Kwayedza
VANA vechikoro, hounoi mukana wekupota muchitumira mibvunzo yenyu kuKwayedza tibatsirane kuti Shona ireruke. Tumirai mibvunzo yenyu kuMupepeti nenhare dzinoti +263 714 200 007 kana e-mail inoti: [email protected] kana [email protected]. Taura zita rako rizere, chikoro chako, giredhi, nenzvimbo inowanikwa chikoro chako.
* * *
MHINDURO DZESVONDO RAPERA:
MuchiShona, mazwi anotevera aya anoreva zvinhu zvakasiyana-siyana. Tsanangura zvinhu zviviri zvakasiyana zvaanoreva.
1. Nhamo (Nhamo yekufa kwemunhu/Nhamo yekushaya mari)
2. Dzihwa (Dzihwa remumhuno)
3. Muti (Muti wemushonga/Muti umire musango)
4. Musikana (Munhukadzi asati awanikwa)
5. Svondo (Zuva repasvondo/Zita rechechi kana kereke)
6. Zuva (Zuva rinopa chiyedza/Zuva repasvondo)
7. Rima (Kurima mumunda/Rima rekunge kusina chiyedza)
8. Kudya (Kudya chikafu nemuromo/Kukunda mumutambo)
9. Mwoyo (Nhengo yepamuviri wemunhu/Kuva kana kushaya netsiye nyoro)
10. Itsva (Chinhu chisati chashandiswa/piswa zvekuita chironda)
* * *
ZVAKABVA KUVANA:
Ndini Cecilia Chigodora, ndinofunda Grade 6 paMuparutsa Primary kuHonde Valley:
Mwana wembeva anonzi chii?
* * *
Serbia Mafunga ari muGrade 4B paMuparutsa Primary School kuHonde Valley ndokuti:
Mwana wehumbwe anonzi chii?
* * *
VeKwayedza pamberi nebasa, muri kugona. Ndinonzi Melody Garafa, ndinodzidza paNdima Secondary School muForm 3.
Zvidavado ndezvipi pakuongorora nekuyemura nhetembo?
* * *
Edina Mukuna ari muGrade 7 paRusvingo Primary School, kuHighfield, muHarare anoti:
Nzvimbo ine runyararo ndeipi isiri chimbuzi, kumakuva kana kudenga? Runyararo rwacho rwuchipinda pakuti kunenge kusina kana shiri dzinenge dzichichema.
(Mochari inogonawo kunzi imba yerunyararo.)
* * *
Tafadzwa Sanyanga wepaMuparutsa Primary School, kuHonde Valley zvakere ndokuti:
Ndiani akatanga kugadzira dzangaradzimu kana redhiyo? (Muna1895 Gugliemo Marconi, wekuItaly ndiye akagadzira yaaiti “wireless telegraph” (wairesi iyo yava kunzi redhiyo) apo aiva nemakore 21 okuzvarwa).
* * *
Tagurwa Bright T ari muForm 3 paNdima Government High School, kwaRusitu, kuChimanimani anoti:
Musoro wekuti “Ndiri pamarumana nzombe” unoenderana zvakadii nezviri mubhuku iri?
* * *
Jacob Dzenga anodzidza paVhengere Primary School, kwaRusape ndokuti:
1. Mazino anotanga kubuda pamwana anonzi chii?
2. Mhepo inonzi petagomwe yakamira sei?
* * *
Dorothy Chikosha wepaMurembe High, kuBindura ndokuti:
Mubhuku rakanzi Sajeni Chimedza tsumo inoti, “Rina manyanga hariputirwe mumushunje” inodudzirwa sei?
* * *
Kudakwashe Nyambabvu anodzidza paZambe Primary, kwaRusape anoda kuziva kuti:
Murume akafirwa nemukadzi anonzi chii?
* * *
Kuchiti Maybe Ratidzo Maganhu ari muForm 3 paMount Carmel High, kuHeadlands anoti:
Musoro webhuku unoti “Ndiko kusasana” unoenderana zvakadini nebhuku iri?
* * *
Heyoka mibvunzo yevana vadzidzisi. Batsirai nekutumira mhinduro kuti vana vazive Shona yemandorokwati.
* * *
ZVEKUITA SVONDO RINO:
Zadzisa pakashama nezwi rakakodzera:
1. . . . . rine makumbo akawanda (Zingizi, Zundu, Zongororo)
2. (Tsuro, Nyoka, Shiri) . . . . yakamujobora.
3. (Nyaya, Nyevhe, Pembe) . . . . yakarira zvine ruzha.
4. (Mwena, Munzwa, Duri) . . . . wakandibaya.
5. (Badza, Dongo, Jongwe) . . . .rakakukuridza.
6. Akanyora . . . . (refu, mvura, tsamba)
7. Musango mune . . . . (vanhu, miti, hove)
8. Kunze kuri . . . . (kure, kukama, kuvhuvhuta)
* * *
Mhinduro svondo rinouya