Kwayedza
naRufaro Chimusasa
Ndiro zita rangu
Ndini shuramatongo
Ndazezesa pasi rose
Vanachiremba vakanda mapfumo pasi neni
Vose vanezivo yekugadzira mishonga
Vashaya mazano neni
Handina tsitsi.
Handisarudzi kana ndouya
Mutsvuku, mutema kana mucheche
Vakuru kana vachena
Vapfumi kana varombo
Zvose ndinokumba nokuti ndiro
Zita rangu shuramatongo.
Paya paya paunenge uchiti ndiri
Kudya nyika rutive
Pfungwa dzako dzisina kugadzikana
Ndipo pandinouya.
Ndonyatso pfunya chisero mauri
Handichakusiyi kusvikira waenda
Kwamabviganebwe
Anoda kuita shamwari neni handirambe
Asi ziva kuti ushamwari hwangu rufu
. Rufaro Chimusasa anodzidza muGrade 7B paSelborne Routledge Primary School, muHarare.
MAONERO:
Ndinofara kana ndichiona vechidiki vari kupuraimari vari kunyora vachiramba vachiwanda. Zvakanaka izvozvo nekuti ndiko kunobva vanyori veZimbabwe vamangwana.
Rufaro Chimusasa asarudza kunyora nhetembo iri pamusoro pechirwere chinozivikanwa zvikuru cheshuramatongo. Izvi ndizvo zvatinoda kuti vadetembi vedu vagone kudzidzisa nyika kuti izive, ipepuke nekuzvichengetedza.
Zvino topinda munhetembo yaRufaro. Handina kufara nekuratidza kusaziva patave senyika nepasi rese maererano nenyaya dzechirwere cheshuramatongo. Munyori wedu asarudza kushandisa mazwi anotyisa achisiya vanhu vasisina tariro, asi hazvisizvo zviri kuitika neshuramatongo. Shuramatongo yakanga iri shumba yairura kare, asi iko zvino yakabatwa. Kwava nemapiritsi kana mishonga anoraramisa, asi isingarape, vane denda iri.
Apa ndipo pandinoda kuti kana mada kuita vanyori, muzive kuti tsvakurudzo yakakosha kuitira kuti munyore zvinhu zvisingazokuitai varevi venhema. Shuramatongo haichazezesa pasi rose, asi kwavewo nezvimwe zvirwere zvakaita sana Ebola neZika. Shuramatongo haichauraya vanhu sezvayaiita kare, kunze kwekunge uchida kufa nekuti unonyara kunoongororwa ropa rako kuti rakamira sei.
Saka kuti tirambe tichishandisa mazwi ekuti “chazezesa,” “handina tsitsi” kutsanangura shuramatongo tinenge tanyanya. Shuramatongo yangofananawo nezvimwe zvirwere zvinenge BP, shuga, asima.
Saka vana chiremba havana kupererwa zvekukanda mapfumo pasi sezvawanyora, uye vane zivo yekugadzira mishonga vanogona kuti hatina zvedu mushonga wekupedza shuramatongo, asi tine mishonga yekuti irege kuuraya munhu. Saka ipapa kuita tsvakurudzo kunofanira kukubatsira.
Ichokwadi chawataura kuti shuramatongo haisarudze vainobata kana yave kuuya. Asi tiudzewo sevaverengi kubata kwayo nekuti kuri pakasiyana-siyana. Kune vamwe vanozvarwa vainayo, vasingaite yekusarudza, kune vamwe vanobatwa chibharo nezvimwe zvakadaro. Saka ndiri kuti iwe sanyanduri tamabanudza pfungwa dzako.
Kana wanyora nhetembo yako, cherechedza kuti zviperengo nemazwi anofanira kubatana kana kupatsanurwa aitirwa zvaanoda. Semuenzaniso:
Ndinonyatso pfunya inofanira kunyorwa ichinzi ndinonyatsopfunya
Kwamapfiganebwe inofanira kunyorwa ichinzi kwamupfiganebwe
Pasina izvi, ndinodada neshungu dzako Rufaro. Ramba uchinyora.
