Kwayedza
Kingstone Mapupu
MWAKA wekutengeswa kwefodya unotarisirwa kuvhurwa musi waKurume 4 uyo unove wanonoka zvikuru kana zvichienzaniswa nemamwe makore sezvo uchiwanzotanga pakati pemwedzi waKukadzi. Sangano reTobacco Industry Marketing Board (TIMB) rakazivisa mashoko aya richiti mwaka uyu wakanonoka kutanga nekuda kwekuti fodya yevarimi vazhinji yakange isati yasvika panguva yekukohwewa.
Chamangwiza weTIMB, Dr Andrew Matibiri, vanoti makambani matatu anotenga fodya anoti Boka Tobacco Auction Floors (BTF), Tobacco Sales Floor (TSF) nePremier Tobacco Auction Floors (PTF) akatopihwa kare marezinesi ekutenga chirimwa ichi.
Varimi, vanodaro Dr Matibiri, vakatanga kunyoresa kuti vatengese fodya yavo musi waKukadzi 18.
Zvakadaro, chamangwiza weBoka Tobacco Auction Floors, Muzvare Rudo Boka, vanoti kambani yavo yakagadzirira kutengesa fodya mwaka uno kudarika mamwe makore.
“Hatina chekumirira, takatomirira varimi vedu kuti vachiuya pamusha wavo semakore ose uripo unotambira varimi vemazera ose. Matambudziko avo tinotambira tichigadzirisa asiwo tinokurudzira kuti vasarudze fodya yavo maringe nezvinodiwa kuti vawane mari yakanaka kwete kusanganisa neyakaipa,” vakadaro.
“Semakore ose, zvimbuzi zvedu zvakashambidzika zviripo, mabhanga edu aripo uye kiriniki yedu pamwe nepekurara zviripo zvakare. Mari yavo tinovapa ipapo kana vauya nenguva vaita zvinodiwawo.”
Managing director vePremier, VaPhilimon Mangena, vanotiwo hurongwa hwavo hwose huri mugwara uye vangomirira kuti mwaka uyu uchitanga.
