Kwayedza
GADZIRIRO dzemutambo weZimbabwe Soccer Legends neAfrican Soccer Legends dzakatanga svondo radarika kuRimuka Stadium, kuKadoma apo pakaona chikwata cheNorthern Region chichitamba necheSouthern mumutambo waiongororwa vatambi vachazosarudzwa kupinda muchikwata ichi.
Mutambo uyu wakazohwinwa neCentral Region 3-0 uye wakatambwa neshasha dzakaita mukurumbira kare dzinosanganisira Stanford ‘Stix’ Mutizwa, Hussein Amidu, Shepherd Muradzikwa, Stanley ‘Samora’ Chirambadare, Stewart Murisa, Carlos Max, Alan Johnson, Eric Isamu naJairosi Tapera.
Zvikwata zvemadzimai zveNorthen Region neCentral Region zvakatambawo zvakare, Northern Region ndokuhwinha 2-0 kozoti kuDivision 2 B Cuma Academy yakasangana neKadoma City ikahwina 3-2.
Mumitambo yemadzimai, shasha dzakanetsa kare dzakaita saRosemary Mugadza, Sandra Muchuchu, Lilian Masase, Ennie Konje, Sithethelelwe ‘Kwinji 15’ Sibanda, Nomsa ‘Boys’ Moyo naFungai Nyamutukwa ndevamwe vakatamba mumutambo uyu.
Technical director weICA Sport, iyo iri kuronga mutambo uyu, Julius Chakupewa akati mazuva ave kuswedera kuti mutambo wavo uchisvika saka vari kumhanyisana nenguva kuumba zvikwata zvichazokwikwidza.
Chikwata cheshasha dzakanetsa munhabvu kuvarume chemuno chichatamba nechevakaita mukurumbira muAfrica yose vakaita saRoga Miller, Kalusha Bwalya naNwanko Kanu. Chemadzimai chemuno chichatambawo necheZambia Women Legends.
Mutambo wekutanga uchatambirwa kuMandava Stadium, kuZvishavane uko kuchaonawo FC Platium ichitamba neMufurira Wanderers yekuZambia musi wa26 Kukadzi. Zvakadaro, mutambo wechipiri uchange uri kuRufaro Stadium muHarare apo CAPS United ichisangana neMufulira Wanderers.
“Mazuva ave kuita achiswedera kuti mutambo uchisvika uye tiri kuona kuti uri kufarirwa zvikuru nevatsigiri venhabvu vazhinji.
“Saka isu takaronga kuti titange kutenderera nyika yese tichironga mitambo yeshasha dzakanetsa munhabvu dzemuno dzichitamba senzira yekuvaka chikwata chichatamba pamutambo uyu.
“Svondo rinotevera tiri kunanga kuGweru uko kuchatambawo shasha dzakanetsa dzekuSouthern Region neCentral Region. Vatambi vanosanganisira Ronald ‘Gidhiza’ Sibanda, Mkhupalo Masuku, Zenzo Moyo, Johannes Ngodzo, Douglas ‘British’ Mloyi, Gift Lunga, Chipo Tsodzo naDazzy Kapenya vanotarisirwa kutamba pamutambo uyu,” akadaro Chakupewa.
