Kwayedza
Kingstone Mapupu
MUTUMBI wemurume harahwa uya wekwaSeke — wekupomerwa kuti muroyi ndokuzopondwa achiita zvekupiswa nemoto, kurohwa nemazishamhu ane minzwa nebakatwa uye achidzipwa nechikwata chevanhurume vaive pachaunga chaisanganisira vanakomana vake — wakavigwa nemusi weChina svondo rakapera. Sekuru Musekiwa Mahungo (89), vemubhuku raChamunorwa vakafa vachipiswa nemoto nekurohwa, pwere nevanhukadzi vachiona mazikati machena.
Mumwe wevanakomana vemunin’ina wavo anonzi akabatsirana nevamwe mukupondwa kweharahwa iyi, David Mahungo (28), akatopinda mudare redzimhosva akatarisana nemhosva yekuponda.
Zvakadai, Mai Stella Magwaza (50), avo vanove muramu wemufi, vanoti Sekuru Musekiwa vakavigwa svondo rapera zvine runyararo. “Mutumbi wavo takauvigwa musi weChina paine runyararo pamusha pavo,” vanodaro Mai Magwaza.
Mudzimai wechipiri wemuchakabvu, Mai Elizabeth Zimbudzana Mahungo (53), vanonzi pakangopedzwa kuvigwa mutumbi wemurume wavo, vakabva vatakurwa nehama dzavo kuendwa navo kumusha kwavo nekuvatyira.
Mai Auxillia Ndoro (47), mumwe wevaramu vaSekuru Musekiwa, vanotsinhira kubva pamusha kwemudzimai mudiki uyu vachiti anga otyira upenyu hwake.
“Amaiguru vadiki vakatorwa nehama dzavo mushure mekutanga kubuda zvakare kwemamwe mashoko ekuvhundutsira madzimai aya kusanganisira ivo Elizabeth Zimbudzana Mahungo naEasther Murombedzi Mahungo (73) (mudzimai mukuru wemushakabvu),” vanodaro.
Sekuru Musekiwa vasati vapondwa, musha wavo wakatanga waparadzwa pamwe nekupiswa zvikasiya mhuri yavo isisina chekubata.
Sekuru Musekiwa vakapondwa apo vaipomerwa kuti ndivo vaichengeta tsvimbo nekadende zvemumusha wavo izvo zvainzi ndezvemudzimu zvinonzi zvaidiwa naDavid nevamwe vake.
Mudzimai mukuru wemushakabvu uyu, Mai Esther Murombedzi Mahungo, vari kutochengetwa nemuroora wavo uye vari kutsvaga rubatsiro rwezvekudya, mbatya pamwe nekuti vavakirwe musha wavo uyo wakaparadzwa.
Kune vanokwanisa kubatsira mhuri iyi vanogona kuridza nhare panhamba dzinoti 0713 323 714 kana 0778 177 863.
