Kwayedza
VARIMI vechidiki, kubva kumativi mana enyika, avo vanova nyanzvi mubasa ravo vakapihwa mibairo svondo rapera kuHarare Agricultural Show pasi pemakwikwi eNational Hurudza Young Farmers’ Awards.
Makwikwi aya aiva muzvikamu zvinokwana gumi zvinosanganisira vanochengeta zvipfuyo, vanorima fodya nezvimwe zvirimwa zvakasiyana.
Mimwe mibayiro yakapihwa kune vanodyidzana nevarimi mumabasa akasiyana akaita sezvikamu zvekufambiswa kwemashoko nekuchengetedzwa kwezviwanikwa.
Zvakadaro, kuchikamu chezvemombe dzemukaka kuvarimi vadiki mubairo wakatorwa naVaWashington Sagonda vekuManicaland uyewo kuvarimi vakuru kukakunda VaGareth Barry vekuManicaland zvakare.
VaYavia Mupfumbati vekuMashonaland Central ndivo vakawana mubairo wekurima fodya kudarika vamwe vechidiki uye kuvakuru ukaenda kuna VaHillary Mutemeri vekuMashonaland West.
Kuchikamu chekurimwa kwechibage kuvarimi vadiki, mukombe wakatorwa naRumbidzai Mazviyo wekuMashonaland Central uyo anova iye woga murimi wechidzimai akakunda mumakwikwi aya.
Kuvarimi vakuru, VaMichael Mutasa vekuMashonaland West ndivo vakakunda vamwe mukurima chibage.
Vaive muenzi anoremekedzwa pagungano iri, Cde Christopher Mushowe, avo vanova gurukota rebazi revechidiki, kuvandudzwa nekusimudzirwa kwehupfumi vakatenda chirongwa ichi zvikuru vachiti chinosimudzira vechidiki.
“Tinokutendai zvikuru nekuronga chinhu chakadai nekusimudzira basa rekurima munyika asi tinoti muite zvinhu zvenyu zvakachena nekuti tine vamwe vechidiki vanoita huwori vachishandisa mazita evakuru,” vakadaro.
Vaive pachiitiko ichi vanosanganisira gurukota reHurumende rinomirira dunhu reHarare, Cde Mirriam Chikukwa.
