Wednesday, Apr 23rd
Headlines:
Sisi mimba yabhudhi tugu PDF Print E-mail
Thursday, 18 July 2013 12:06

naKingstone Mapupu
VAGARI vekwaMutoko havachisina neremuromo zvichitevera makunakuna ehanzvadzikomana nehanzvadzisikana avo vakapanana pamuviri, nyaya yakatopinda mudare rashe weko vaviri ava vakaripiswa mombe.

 

Nyaya iyi yakaitika mumusha waSabhuku Gufu, uko kune mukomana nemusikana vaigara naambuya vavo, Mbuya Nancy Kachidza, vaviri ava ndokudanana zvekusvika hanzvadzisikana kuita mimba.

 

VaMichael Gurupira (50), avo vakafanobata chinzvimbo chaShe Mutoko, vakatsinhira nyaya yevana vemhuri imwe chete ava vakapanana pamuviri vachiti yakatopinda mudare ravo.

 

“Nyaya iyi yakapinda mudare raShe Mutoko, vaviri ava vakapihwa mutongo wemombe mbiri, mhou nemhuru yayo, nekuda kwemakunakuna avakaita. Mukomana nemusikana vakabuda pachena kuti vaidanana, havana kumboramba nyaya iyi “ vakadaro VaGurupira.

 

Hanzvadzikomana inopinda Form 4 pachikoro cheMutoko Central Secondary School uyuwo musikana ava kuita Form 3 ari kuMarondera.
Ambuya vevana ava, Mbuya Kachidza vakabvuma kuti nyaya iyi yakaitika kuvazukuru vavo. Muzukurukomana anonzi mwana wemwanakomana wavo mukuru, Zvovamwe

 

Kachidza, musikana ari mwana wemwana wavo mukomana mudiki, Tendai Kachidza.
“Chokwadi vana ava vakandinyadzisa zvikuru asi ivo vari vazukuru vangu vose. Mukomana ndiYeukai Kachidza (18) musikana ari sazita wangu, Nancy Kachidza (17). Vana ava vakaungana pano pazororo remuKisimusi gore rakapera panova pakaita makunakuna aya apo vakarara vose ndokupanana pamuviri,” vakadaro Mbuya Kachidza.

 

Vanoti gore rapera, Nancy (jnr) akabva kuMarondera ndokuenda kumusha uku aine vamwe vake ndokusvikowana Yeukai uyo anogara naambuya asiko sezvo akange aenda kuHarare kunobvakacha.

 

Yeukai anonzi akazobva kuHarare ndokusvikowana vamwe vazukuru ava vari pamusha naambuya ndokutanga zvavo kugara pamwe chete, ambuya vasina ruzivo rwekuti vaviri ava vakanga vave kudanana.

 

“Ivo vachitaura nyaya yavo apo nhumbu yakanga yazobuda, vose mukomana nemusikana vanoti vakabvumirana kushereketa apo isu tose taiva tichishanda mumunda medu pamusha. Nancy akabva mumunda ndokuenda kunotsvaira mumba, apo Yeukai akavererawo kubva mumunda ndokuenda kumba uko vanoti vakasvikoshinha vose,” vakadaro Mbuya Kachidza.

 

Vanoti nhumbu iyi yakazobuda mumwedzi waChivabvu gore rino, apo Ruth Gwaze, amai vaNancy, vakaona pamuviri apa vari kumba kwavo kuMarondera.
“Vachibvunza mwana uyu haana kuvavanzira, akadura kuti nhumbu iyi yaiva yaYeukai, zvikashamisa vanhu vose, isu tikazoziviswa nyaya iyi,” vakadaro Mbuya Kachidza.

 

Mbuya ava vakabvuma kuti nyaya yevana ava yakapinda mudare vakanzi varipe makunakuna aya nemombe mbiri, mhou nemhuru yayo.
“Hatisati tabvisa miripo iyi, zvakare pano pakazouya mapurisa vachibvunza Yeukai nezvenyaya iyi tikazoenda kukamba tose naYeukai.

 

“Zvinonzi Nancy ave kuramba zvakare kuti vaidanana, ave kuti akamanikidzwa izvo zvave kuita seakabatwa chibharo uye mapurisa acho vakangoti vachazodzoka kana vakwanisa kunotaura naNancy kuMarondera. Hamheno kuti ichapera sei,” vakadaro.

 

Mbuya ava vanoti hapana zvavaiziva panyaya iyi kubva pakaitwa makunakuna aya kusvikira Nancy nevamwe vake vakadzokera kuMarondera.
“Zvinoreva kuti nhumbu iyi yasvika mwedzi mitanhatu.

 

“Ndine vazukuru vakawanda zvikuru vakomana nevasikana asi zvave kundityisa kuti vaungane pano vose vachibva kwakasiyana nekuti imwe nguva vanogona kudzokorora zvakaitwa nevamwe vavo izvi,” vakadaro.

 

Mutauriri wemapurisa kudunhu reMashonaland East, Insp Bulisani Bhebhe, vakati vakange vasina ruzivo rwakazara pamusoro penyaya iyi nekudaro vaida nguva yekumboiferefeta.

 

Polls

KURWISA HUWORI KWEHURUMENDE YEZANU-PF NHASI KUNOREVA ZVAKAWANDA PASARUDZO DZICHATEVERA MUNA 2018.
 

Documentary

Social Networking Links