neMunyori weKwayedza
MAPURISA ekudunhu reMidlands ari kukumbira

kuruzhinji kuti vabatsire nemashoko nekuda kwemotokari yakabiwa pedyo nerimwe bhawa mudhorobha reGweru.
Vakafanobata nzvimbo yemutauriri wemapurisa kudunhu reGweru, Assistant Inspector Emmanuel Mahoko, vanoti motokari yakabiwa iMazda B16 00 yegreen ine nhamba dzinoti AAM 3485.

Motokari iyi yakabiwa pabhawa reLegion mumugwagwa waFifth mudhorobha iri.
Nyaya iyi yakaitika nemusi wa28 Chivabvu apo muridzi wemotokari iyi, Steven Hove (48), anobva kuMontrose kuGweru anonzi nenguva dza8 usiku akasvikomisa motokari yake kunze kwebhawa iri ndokupinda zvake mukati umo ainotamba mutambo wemadats nevamwe.
Murume uyu anonzi paakazobuda mubhawa umu ava kuda kuenda kumba, akasvikowana paaiva akamisa motokari yangova nzvimbo chete ndokuzomhanya kunomhan’ara kumapurisa ayo akabva atanga kuferefeta nyaya iyi.

“Semapurisa tiri kukumbira kuruzhinji kuti vatibatsire nemashoko ekuti tikwanise kuwana motokari iyi nekusunga vacho vakaba motokari iyi. Kune vane zvavanoziva ngavaridze nhare panhamba dzinoti (054) 221075, kana kutaura nemapurisa anenge ari pedyo navo,” vakadaro.
Vakayambira vatyairi vemotokari kuti vangwarire matsotsi ayo ave kushandisa dzimwe nzira dzepamusoro pakuba motokari. Semuenzaniso, vakati makororo aya ave kushandisa michina yekuvhura nekuvhara magedhi yema“gate locking systems” apo vanonzi vanomira pedyo nevanhu vanokiya motokari dzavo nenzira dze“central locking system”  idzi vobaya mabhatani emichina iyi zvinoreva kuti madhoo emotokari idzi haakiye kana zvanzwarwo.

“Kune vatyairi vane motokari dzavo dzinokiya nerudzi urwu, tinovakurudzira kuti vashandise mawoko zvakare pakutarisa kuti madhoo avo anenge akiya here pane kungoshandisa mabhatani aya,” vakadaro Asst Insp Mahoko. 
Vanoti dzimwe nguva matsotsi anotobaya mabhatani aya muchina uyu uri muhomwe apo  mutyairi anenge achikiya motokari yake inonzi haizokwanisa kukiya ivo vozouya vachisvikoiba kana kuba zviri mukati. Matambudziko akadai aya anonzi ari kunyanya kuitika kuMkoba kuGweru.
Vakayambira vatyairi kuti vasiye motokari dzavo panzvimbo dzakachengetedzeka pamwe nekuti vabvise zvinhu zvakakosha sezvo izvi zvichikwezva makororo. -Kwayedza