naShein Kanyumwa
MUIMBI Hosiah Chipanga, uyo

ane makore akawanda achiimba mhanzi asi zvinhu zvake zvichiramba kumufambira zvakanaka, oti haasi kuzomira kutsikisa mhanzi yake kunyangwe zvazvo isiri kutengwa nekuda kwepairesi.
Chipanga ave nenguva asati aita mashoo gore rino mushure mekutizwa nedzimwe nhengo dzake idzo dzakaramba kudzokera kunogara naye kwaMutare apo akanga aomerwa neupenyu muHarare.
Chipanga akati  haasi kuzomira kutsikisa rimwe dambarefu nekuti anoda kufadza vatsigiri vake.

“Kunyangwe zvazvo pairesi yakatikakata bhande kunyanya kunesu vaimbi, ini handifunge kuti zvinganditadzise kutsikisa rimwe dambarefu.
“Pairesi kuti ipere tinofanirwa kuirwisa kwete kuti toregera kutsikisa mhanzi nekuti vanhu vari kuita pairesi mhanzi yedu zvinhu zvinokanganisa isusu vaimbi sezvo vanenge vave kuti tazopera manje,” akadaro Chipanga.
Muimbi uyu akaenderera mberi achishora vose vanotenga mhanzi yepairesi pamisika yemikoto vachisiya inenge yakabikwa nomazvo.

Chipanga akati pari zvino ari mubishi rekudzidzisa nhengo dzakatsiva vakomana vake vakamutiza paakadzokera kunogara kwaMutare avo vaakatora sevanhu vanoda hupenyu hwemuHarare. “Ndakarasikirwa nedzimwe nhengo dzangu apo pandainge ndave kuda kudzokera kwaMutare,  zvinhu zvakandiratidza kuti vakomana ava vanovarairwa nekanhu kadiki uye nekuda upenyu hwechirungu asi munhu unofanirwa kujaira zvese.
“Harare yakanga yandiomera  saka ndakafunga zvekudzokera kunogara kumba kwangu kwaMutare pane kuroja kwandaiita izvo zvaindipedzera mari zhinji,” akadaro Chipanga.-Kwayedza