neMunyori weKwayedza
VAIMBI venziyo dzechitendero vane muku­rumbira,  Pastor Charles Charamba naBlessing Shumba, vakaita shoo yakafadza vanhu vazhinji kuChitungwiza svondo rapera iyo yakavasiya vachiine nzara yemimhanzi yavo. Shumba ndiye akatanga kudziisa siteji apo akaimba mhanzi yakaita muku­rumbira yakaita sanaNzira Yashe nedzimwe dza­kamupa mubairo.
Paakabva pasiteji vanhu vakasara vachine nyota vachishevedzera kuti dai akaramba aripo.
Izvi zvakataridza kuti mhanzi yaShumba inobata vanhu vazhinji sezvo vamwe vakasvika pakuchema chaiko kuburikidza nekunakirwa  nayo.
Pastor Charamba pavakazopinda pasiteji vanhu vakanga vatova mugiya dzvuku uye vakaridza nziyo dzavo dza­kaita mukurumbira  makore achango­darika  dzinosan­ganisira dzinoti Buruka, Mhinduro, Tinashe Akatendeka, Mukondombera.
Pastor Charamba vakaratidza kuti kunyangwe zvazvo vari muimbi akab­vira kare asi chiramba kusakara sezvo maimbiro avo airatidza kuti vachiri kuramba vachikura vasin­gapere sesipo sezvinoita vamwe vaimbi vanongoita mukurumbira kwenguva pfupi-pfupi.
Mukutaura navo vakati zvinhu zvi­novafadza kuona vanhu vachirumbidza mhanzi yavo uye kuuya vari mavhu nemarara kumashoo avo izvo zvinoratidza kuti simba raMwari riri kushanda mavari.
Zvakadaro, Shumba akati kuimba nziyo dzechitendero yaive imwe nzira yeku­paridza shoko raMwari.
Akati aifara zvikuru kuita shoo naPastor Charamba avo vaakati vari kumutaridza gwara raka­jeka munyaya dzekuparidza humambo hwekudenga.