naAbel Ndooka
MUJAHO weTour deTuli-Mapungubwe wakaparurwa svondo rapfuura

nemunyori mukuru mubazi rinoona nezvenharaunda nekuchengetedzwa kwezviwanikwa, Florence Nhekairo, uyo uchaona shangwiti dzemutambo wecycling dzepasi rose dzichiungana kuTuli mwedzi uri kutevera.

Gore rino Zimbabwe ichange ichimiririrwa nevatambi vatatu vanoti Freeman Mhlanga, Patrick Pabwe naPedro Chabuda uye aka kachave kekutanga kuti nyika ikwikwidzewo mumujaho uyu kubva pawakatanga kuitwa mugore ra2009.
Vatambi ava vachabatana nevamwe 397 vachabva kune dzimwe nyika dzinosanganisira South Africa, Germany, Canada neBritain mumujaho uchatangira Botswana wopfuura nemuZimbabwe uchizonoperera kuSouth Africa.
Nhekairo akati kupinda kwevatambi vemuZimbabwe mumutambo uyu kwakakosha zvikuru nekuti zvichabatsira kusimudzira mureza wenyika pamwe nechikamu chezvekushanyirwa nekuuya kuchaita vamwe vanhu vekunze kwenyika.

“Tine mufaro mukuru kuti gore rino kekutanga Zimbabwe ichange ichimiririrwa nevatambi vatatu kanove kekutanga kusiyana nemamwe makore pataishaya vamiririri iwo mujaho uchiitirwa munyika ino.
“Mujaho uyu wakakosha kunyika yose nekuti uchabatsira mukusimudzira mureza wenyika munyaya dzekushanyirwa nekuuya kuchaita vatambi vakawanda kubva pasi rose vachikwikwidza,” akadaro Nhekairo.
Uchatangira kuBotswana musi 2 Nyamavhuvhu uko vanenge vachikwikwidza vachapedza zuva rimwe variko vozouya muZimbabwe zuva rinotevera umo vanenge vachitenderera kuTuli neMapungubwe kwemazuva matatu vozonanga kuSouth Africa musi wa7 Nyamavhuvhu.-Kwayedza