SVONDO rapfura takatarisa mhando ina pane gumi nenhanhatu dziri pasi pemutemo weDomestic Violence Act. Vhiki rino tinoda kuongorora dzimwe mhando dzekushungurudzwa kunoitika mudzimba idzo dzinoti:

(i) kutyisidzira
(ii) kushungurudza
(iii) stalking (kuteera-teera munhu zvaasingadi)
(iv) kuparadza mudziyo kana kuti midziyo yemumwe
(v) kupinda panogara munhu nechisimba  usina mvumo
(vi) kushaisa mumwe mukana kana kumurambidza kushandisa midziyo neimba

Ngatitangei nenyaya yekutysidzira. Pamutemo, hazvibvumirwe kungopota uchityisidzira munhu kana kuti vanhu vatinogara nekuvakidzana navo. Semuenzaniso, unonzwa munhu achivhundutsira mumwe kuti ndokudzinga pano kana kuti anotaura achinongedzera vamwe zvinovaita kuti vatye, vatadzewo kutaura zvinenge zvichivashusha mumoyo mavo.

Pane kutyisidzira kuripo kwekuda kuisa mwana mugwara sekuti ukafoira upenyu hunokuomera. Kutyisidzira kwakadaro haisi mhosva pamutemo asi kuraira.

Imwe mhando yemhirizhonga ndiyo yekushungurudza kana kuti “harassment” pachirungu. Iyi imhando yemhirizhonga mudzimba.
Semuyenzaniso, munhu haubvumirwe kungoramba uchifonera-fonera mumwe parunhere yake uchimutuka kana kungomufonera zvisina mvumo yake.

Mazuva ano kumabasa vakawanda vedu tinoshandisa makombiyuta. Haubvumirwe pamutemo kutumira tsamba nekombiyuta (email) dzinenge dzisingadiwe nemunhu iyeye.

Dzimweni dzenguva unenge uchifunga kuti mumwe ari kuzvida asi iye anenge asingadi. Imhando yemhirizhonga isingatenderwi zvachose nemutemo.

Imwe mhandozve ndiyo inonetsa vakawanda kuti vanzwisise, inonzi “stalking” pachirungu kana kuti kuteera-teera munhu zvaasingadi.

Mhando iyi inonetsa vakawanda kuti vanzwisise nekuti pachivanhu chedu tinoti kana murume achipfimba mukadzi anokwanisa kupota achimuteera-teera, nyangwe mukadzi wacho asingadi nekuti tinovimba kuti mukadzi ane hunhu haakurumidze abvuma shoko rinenge rasvitswa nemurume kunyangwe achida.

Zvino pasi pemutemo, munhu haufanirwe kungoteera-teera munhu nyangwe ari mukadzi wako kana kuti murume wako.
Imwe mhando ndiyo yekuparadza mudziyo kana kuti midziyo yemumwe. Izvi zvinosungisa. Kukanda runhare rwemumwe wako pasi, kuputsa matelevision nekuti watsamwa imhosva.

Imwezve mhando ndiyo yekupinda panogara mumwe usina mvumo nechisimba. Izvi zvinowanzoitika kana vanhu vaimbenge vari muwanano vasisiri pamwe chete. Dzimweni dzenguva munhu anenge atora yatinoti “protection order” inova tsamba inopihwa nedare.

Dzimwe tsamba dzinenge dzichidzivisa anenge achikonzera mhirizhonga kuti asauya pamba pemumwe. Kuenda pamba nechisimba kutyora mutemo.

Vaverengi vane zvavanoda kuziva pamusoro pemutemo makasununguka kufona pa: 0714 200 007 kana kutumira email pa: kwayedza@zimpapers.co.zw

naMuchaneta Chimuka

SANGANO reThe Zimbabwe Widows and Orphans Trust riri kubatsira chirikadzi nenherera pakurwisa dambudziko rekumbunyikidzwa kwavanoitwa panguva yekugova nhaka.

Mai Mary Agripa, vanove nhengo yeBoard of Trustees kuZWOT, vanoti vane magweta anomiririra madzimai nenherera pachena.

“Tine nherera dzakawanda nechirikadzi avo vanombunyikidzwa mushure mekufirwa apo vanotorerwa midziyo yakadai sedzimba, motokari, minda nezvimwe nehama. Midziyo iyi inogona kunge yakanyoreswa mumazita avo sevadyi venhaka asi vopedzisira vaitorerwa nekuda kwekushaya ruzivo kana kuti panogona kushandiswa chisimba,” vakadaro Mai Agripa.

Vanokurudzira vanhu kuti vanyore mawiri ayo anobatsira kuti pazivikanwe vakakodzera kutora nhaka yemufi.
“Wiri rakakosha zvikuru nekuti vamwe vabereki vari kusiya vana vari vadiki kwazvo, nokudaro dzimwe hama dzinogona kuita hudyire dzotora midziyo yose, vana vakashandirwa vaye vosara vachitambura. Kana paine wiri zvinoita nyore kunyangwe kumatare edzimhosva kuti vange vachipa mutongo,” vakadaro.

Mumwe wechirikadzi dzakabatsirwa nesangano iri, Mai Netsai Mpofu (40) vakati vakange vatorerwa imba nehama dzemurume wavo.
“Murume wangu, George Mpofu, akashaya muna2007 saka patakange tiri panhamo ndipo pakauya hama dzake dzikanditorera magwaro emba.
Ndakasiiwa ndiine mwana mumwe chete asi nhasi ndinofara nekuti ZWOT yakandibatsira nemagweta epachena ndikadzorerwa magwaro emba uye ndave kugara mumba mangu nemwana wangu kuKambuzuma,” vakadaro Mai Mpofu.

Mai Agripa vakakurudzira vanhukadzi vari kusangana nematambudziko akadai kuti vaende kumahofisi avo panhamba 33 Bath Road, Avondale, muHarare kunotsvaga rubatsiro nekukasika.

neMunyori weKwayedza

VANHUKADZI hounoi mukana wekuti muhwinhe mibairo mikuru yakarohwa nechando mumakwikwi eKwayedza African Woman of the Year.

Tumirai mifananidzo yenyu makapfeka mbatya dzezvipfeko zvemuAfrica (African attire) kuKwayedza, bepanhau revanhu, kuti muve nemukana wekuhwinha mibairo inosanganisira zvitofu, mazakwatira emari pamwe chete nemachira ekusonesa zvimwe zvipfeko. Mifananidzo iyi ngaiperekedzwe nefomu rinenge rachekwa kubva muKwayedza.

Musakanganwe kupedzisa mutsara uri pafomu iri uye kuisa zita renyu, nhamba dzepamunogara pamwe chete nedzenhare.

Zvakawanda nezvemakwikwi aya onai sekushambadzwa kwazvakaitwa pazasi. Mifananidzo inotumirwa ichaburitswa muKwayedza svondo rega-rega dakara tasvika pakuhwinwa kwemibairo gore rino. Madzimai pindai mumakwikwi aya muhwine!

naDaphne Machiri
MUMWE mukadzi akataurira dare kuti vatezvara vake nemwana wavo vakatora upfumi hwaakange asiirwa nemurume wake wekutanga uyo akafa vakahuparadza asi paave kuda mendenenzi tezvara ava voti havana chavanomupa.

naMuchaneta Chimuka
ANOFANIRA kuronga nezvebhajeti remari yekushandisa mumba pangave pakupera kwemwedzi kana kwevhiki ndiani? Murume anoronga oga here, nemukadzi wake kana kuti mumwe nemumwe anozvionera?

neMunyori weKwayedza
MUSIKANA wemakore 17 okuberekwa wekuBinga, uyo airwara nedenda repfari, anonzi akawira mudhamu akafa mushure mekushaya akamubatsira.
kunoraura

naKingstone Mapupu
IMBOFUNGA izvi! Urere zvako hope dzehumambo pamutepfetepfe wemubhedha mumba mako. Panoyedza kunze, heano mashura, unomuka pakati pemba yako pakamera mutumba wechuru, kwete kachuru, asi churu chakakura zvekunobata denga remba. Unoita sei?

Maonero EduZVIKORO zvakavhurwa svondo rino, vana ndokunotangazve imwe yematemu anorema pakudzidza. Temu ino inorema pakuti kunze kunenge kwakanyenama, kuchitonhora uye kuvana vachanyora bvunzo pakupera kwegore ndiyo yavanofanirwa kuita gadziriro dzakasimba.

naMuchaneta Chimuka
MUMWE mukomana wekuChimbindi, kwaSeke anoti ari kunetsekana nenyaya yekuti hama dzake dzakamutengera bhokisi rekumuviga ari mushure mekunge dzatambira mashoko ekuti iye ainge afa asi ari mupenyu.

naSimbarashe Chisenwa
MAI vekushungurudzwa nemwanakomana wavo, zvisinei nekuti vakambopihwa gwaro redziviro, vakapotera zvakare kudare vachiti vachiri kungorohwa pamwe nekunzi varoyi apo mwana uyu anenge achitsigirwa nababa vake.

naSimbarashe Chisenwa
MURUME wekuti anobviswa hembe nemukadzi wake pamberi pemaroja pamwe chete nekudzingwa pamubhedha achirariswa pasi akatozopotera kudare. Panganai Jeji akaudza dare reHarare Civil Court kuti mukadzi wake, Lydia Masviba, ane hutsinye hwakadarikidza. “Handisati ndakamboona mukadzi ane hutsinye kudai, kuti nditi ndakapihwa naMwari