Kwayedza
. . .Lenox Lewis otsigira Klitschko
LENNOX Lewis anofunga kuti Wladimir Klitschko anokunda Anthony Joshua, asi hunge kudai murairidzi wake mushakabvu Manny Steward achiri mupenyu.
Lewis anoti zvakare mutambi uyu – uyo ane makore 40 okuberekwa – aisambokundwa naTyson Fury kudai Steward aive achiripo achimurairidza. Mutambo unotevera waKlitschko wave kuitwa musi wa29 Kubvumbi apo achasangana naJoshua.
Steward aionekwa seshasha pakurairidza tsiva munhorondo yemutambo uyu kusvika panguva yekushaika kwake mugore ra2012 apo ainge avhenekwa achirapwa chirwere chinonzi diverticulosis aine makore 68 okuberekwa.
Pamusoro pekurumbidzwa kuti ndiye akasimudzira vatambi vakaita saLewis naTommy Hearns – Steward anopihwa mbiri zvakare achinzi akavandudza tarenda raKlitschko mugore ra2004 apo akange adzikira mumutambo uyu sezvo ainge azvakatswa zvakasimba kaviri mumwedzi 13.
Steward ndiye akamira-mira kuti Johnathon Banks chizvarwa chekuAmerica chigadzwe kuve murairidzi mutsva waKlitschko achimutsiva.
Asi ari pasi paBanks kudaro, chizvarwa chekuUkraine ichi chakabva chakundwa naFury mugore ra2015 apo akange apedza makore 11 asina kumbokundwa.
Muna Kubvumbi gore rino kuWembley Stadium, achange achirwa kuti achengetedze zita rake mumutambo uyu apo achasangana naJoshua uyo anogona zvikuru.
Asi Lewis – uyo anoziva mashindiro aiita Steward – anofunga kuti kudai aivepo zvaigona kubatsira Klitschko.
“Dai Manny ange achiri pano, Klitschko achiri shasha yepasi rose, ari mutambi wepamusoro,” Lewis akadaro.
“Ndaibva ndatomuisa pamusoro kukunda Joshua kudai Manny Steward ange achiri pano.
“Kurasikirwa kukuru nekuti aida Emanuek, uye zvakaoma kutsiva Emanuel. Parizvino ari kugadzirira ega, hazviite kuti agadzirire ega pasina ari kumurairidza nekuti Manny aironga zvinhu zvakawanda zvekuita panguva dzakasiyana. Ndinozviziva zvose.” – Daily Mail boxing.
