Kwayedza
NDAUWE ndauwe akhiti woye! Takumanahe nyamashi, kunyazi kubanziyo kunopisha, tinondobuda koodongorere kumaminda. Ari Pfidza anoti tapfidza ndiro zuwa. Ari Nyanyadzi anoti ranyanye kupisha kwedu uno.
Munoti inokakasa yanaya ere mukore uno, asi chidziisira chacho ngechemvura anhunai. Izvi taakuzvisiira Musikaantu. Isisu zvedu takaita tikapedza eya. Doro remakoto rakahamba kahle, tinobonga yaemho.
Tingati pangaa neuri kushirike mvura ere. Kana tamuzwa, kubva kumbaandenderedzana naye takaringire kwaMambo. KwaMambo akuna beto, akadaro asharuka edu. Izvi tichazozviringira hedu ngerimweni zuwa kuti tizwe kuti asharuka emuganga anoti kudini ndizvo.
Nyamashi uno tinode kubhuya ngegama rinoti kufohla. Chiro chimwe ngachimwe pane pechinotangira, kuroorwa nakwo pane pekunotangira, kana upenzi pane pehunotangira asi nyamashi atireketi ngemapenzi akadi.
Kufohla kutizire kwende kumwamuna kunoizwa ngemhandara kana kuti chabuya kubudikidza ngekuwirirana kwawo airi aya. Kuti muntu azwi waa kude koofohla, zvinonga zvamboite chekudi anhunai. Aufohli akadi musikazi kutenderana imweimwe aonani.
Kazhinji kacho munhu unoende koofohla unonga areme pakati, ndikwo kuti unonga aane mimba, ingaa doko kana kuti yaakuoneka ngemunhu weshe. Yaa kuoneka kudaro, kubva anhu anonga aakundoreketazve kuti unoenda riini, asi chiro chakwecho achizi kuhamba kahle naJohn. Tsika yekufohla pachiNdau inoizwa madeikoni. Kunyazwi musikana eibve kuretu zviyana, unotouya masikati kuzogarire mudhuze atei kwaa kuti tsva-a, womiruka hake akaringire kumunikazi wendani. Unokone kuuya ega musikana kana kuperekedzwa hake, nhando chinonga chamurerukira nyakuzvimbirwa uyu.
Garegare, musikana uya unozomiruka wohambe kwende kumuzi rejaha atei agume pagedhi rekupotere pachiwanze chemuzi. Kubva ndiye gwadagwa aripo akazvifukidza ngejira jena. Aripozvo pagedhipo, unosise kukotsora kuti anikazi emuzi apatike kuti heunokotsore kugedhiyo ndiyani, umbori ani unokotsora asingagumi pambatso. Asi anhu anonga hawo eiziya kuti ari kukarire muenzi wemuhlobowo.
Adaro zviya, ari kumhatso kuya azwa gotsorwaro risingaperi, anorumbe kugedhi kuya, oduse mare yawo kuti makhoti uya apotere muchiwanze. Ino mukutukutu wake muchena uya undori nawo muhopemwo. Apeenoo kuti unonga asikatyi kupumhunwa ere apo anonga eihambe kupinde muchiwanzecho.
Tochindoti mapofu anohamba aya, anoite muhambirenyi. Tinaye makhoti, akati hambehambe, ndiyehe gwadagwa pamusiwo wekupotere mumhatso. Mwodusahe kamare kuti aone kupotere mumhatso. Kuti muone hopeyo yakafukidzwe mujira jena, kwaakutobhadhara. Aonani ndiwo aziyani.
Photophoto kudai, unobvunzwa muzakazi kuti unohambira ani pamuzi pano. Kuti aripo, unoronza hake munikazi wengoma, kuti asipo, anaatete anochimubhuira kuti toemera John wacho ngemugobera apo anouya azvireketere emene.
