Kurima soya beans neSeed Co

19 Aug, 2016 - 00:08 0 Views
Kurima soya beans neSeed Co

Kwayedza

Philip Matombo
MAKADINI varimi kumativi mana enyika? Tinokugamuchirai pachirongwa chamunounzirwa neSeed Co, cheMudhumeni Mukuru, apo tinokurukura nekudzidzisana marimirwo embeu dzakasiyana-siyana. Svondo rino tiri kubata marimirwo esoya beans. Chirimwa ichi chakanaka samare sezvo chiri kupa pundutso kuvarimi vakawanda muZimbabwe. Tikadzirima nemazvo uye nenguwa, tine mukana wekuti padhora rimwe ratashandisa rinopetwa kaviri kana katatu pakukohwa.

Soya beans chirimwa chisinganetsi kutengesa nokuti chinoshandiswa kugadzira zvikafu zvakawanda. Chirimwa ichi chinogadzira chega fetereza yapamusoro uye chinosiya imwe muvhu ichizoshandiswa nechirimwa chinoitevera.

Seed Co yakakuuchikirai mbeu dzesoya beans dzinoti Sc Serenade, Sc Safari, Sc Status neSc Sequel. Hezvinoi zvinotarisirwa pakurima soya beans:

Ivhu nemwaka:
Soya beans chirimwa chinofarira ivhu gobvu (heavy clay soil), muivhu rakaregedzeka (sandy soils) dzinoita asi goho rinenge rakaderera. Sezvo mhodzi dzesoya beans dziri doko, minda yedu inofanira kutsetseka pasina mavhinga mahombe anotadzisa mbeu yedu kumera. Mwaka watinokurudzira varimi kuti vatange kudyara soya beans kubva musi wa15 Mbudzi kusvika 15 Zvita. Kudya nguva iyi kunoitisa kuti goho rivandudzike.

Kuiswa kwefetereza:
Soyabeans hadzitipi goho rakanaka kana ivhu richinyanya kuvava kana kutapira (soil pH), saka tinokukurudzirai kuti mutange maongororesa ivhu renyu kunana mazvikokota vakaita sevemakambani anogadzira fetereza. Mbesa yedu iyi inotipa goho guru kana ivhu richivava zviri pakati nepakati (soil pH iri pa5.5).

Soya beans dzinoshandisa zvakanyaya kudya kwagara kuri muvhu saka fetereza yepasi inowanzodiwa iri 200 kusvika ku300kgs pahekita iri yemhando yeCompound L inenge iine kudya kunodiwa nesoya beans kuchidzivirira kudonha kwemaruva. Tinokukurudzirai kuti mutenge Rhizobium inosanganiswa nembeu pakudyara, izvi zvinobatsira kuti soya beans dzizvigadzirire dzega fetereza yapamusoro. Rhizobium inowanikwa zvakare paSeed Co Stapleford pamunoudzwa mashandisirwo ayo.

Mhando dzembeu:
Seed Co ine vauchiki vembeu dzesoya beans vanouchika zvemandorokwati zvekuti vanorima mbeu idzi havazodi kana kunzwa nezvedzimwe mbeu. Kuti Seed Co ndiko kuti mbeu . . . Ndivo vakauya neunyanzvi hwekuuchika mbeu dzinoshingirira kuchirwere chesoyabean Rust dzakaita seSc Status neSc Sequel. Idzi mbeu dzakanakira kuti dzine mukoho unodarika 4 tonnes pahekita apa murimi asingapedzi mari nekufirita mushonga.

Zvakadaro, tinewo dzimwe mbeu dziri kumhanyirwa nevarimi dzichivapawo goho rinodarika 4 tonnes pahekita dzakaita seSc Serenade neSc Safari. Mbeu idzi dzadengenyedza nyika nepamusana pegoho guru radziri kupa varimi asi tinokukurudzirai kuti mufirite nemishonga yema Fungicides kutanga pamunoona maruva ekutanga nekuti dzinodhererwa nechirwere chinonzi Soyabean Rust. Tinokurudzira varimi kuti mutenge mbeu dzakauchikwa nekuti dzine goho guru, dzinoshingirira muzuva, hadzikurumidzi kuputikira mumunda (pod shattering), dzinosiya chinhambo chakanaka kubva pasi kusvika pamhodzi yekutanga (pod clearance) uye hadzidonhi mumunda (lodging) ukadyara madzinde atinokurudzira pahekita

Kudyara soya beans:
Hekita inoda 100kgs dzembeu kuti tiwane 350 000 madzinde mumunda. Madzinde akawandisa kupfuura 500 000 pahekita goho rinodzika uye soyabeans dzenyu dzinowa (lodging), akanyanyoitazve mashoma goho rinodererazve. Kuti tiwane madzinde aya pahekita kubva pamutsara kuenda pane mumwe (row spacing) inofanira kuita 45cm uye kubva padzinde kuenda pane rimwe mumutsara (in-row spacing) inofanira kuita 5cm. Kudzika muvhu (planting depth) tinofanira kudyara 2.5cm kusvika pa5cm zvichisiyana nevhu.

Tichingopedza kudyara ngatiisei mishonga wesora yatinowana kubva kumakambani akasiyana. Zvinoreruka kushandisa mishonga yesora pane kusakura uye patinosakura nemaoko sora rinenge ratodya kare chikafu chinofanira kudyiwa nembeu yedu, goho rinenge ratoderera. Zvakati rerukei kushandisa mishonga yesora inoiswa mbeu nesora zvisati zvamera (pre-emergency herbicides) pane kushandisa mishonga inoiswa mbeu nesora zvabuda (post emergency herbicides).

Tumbuyu nezvirwere:
Pane makonye (semi-looper caterpillars) anodya mashizha inova fakitori yembeu dzedu. Tinokukurudzirai kuti mufirite nemishonga yamunokurudzirwa nevarimisi. Kune chirwere chekuomesa mashizha (soyabean rust), saka semurimi tenga mbeu dzakadzivirirwa kare dzandamboreva seSc Status neSc Sequel. Kana watenga dzimwe dzisina kuzvidziivirirwa munofanira kudzivirira nekushandisa mishonga.

Kutengesa soya beans:
Soya beans dzinotengwa nemutengo wakanaka uye mutengo wacho hauwanzoshanduka. Dzinotengwa nemakambani anosvina mafuta, anogadzira chikafu chezvipfuyo uye kazhinji kacho unobva wakabata mari yako kana wanotengesa zvinova zvinofadza. Soya beans dzinowanzokurumidza kuibva nekubviswa mumunda zvinova zvinobatsira kuti murimi afanopedza nhamo dzinenge dzichimushungurudza uye kune vanorima gorosi remuchando, unokurumidza kudyara gorosi wozowana mukuho wakanaka. Mitengo yesoya beans inowanzotambira pa$580 patonne zvichireva kuti sevarimi, pahekita tinogona kuwana mari inoita $1 160 kusvika pa$2 330 tashandisa $600-$800 pahekita.

Saka chirimwa ichi chinobhadhara zviri pamusoro. Varimi tinokukurudzirai kuti mutenge mbeu mwaka uno kubva kuSeed Co. NeSeed Co unotokohwa chete. Imwi munozviziva wani, “Kuti Seed Co ndokuti mbeu . . . Kuti mbeu ndokuti Seed Co.

Kana mune zvamunoda kuziva kubva kuMudhumeni Mukuru ridzai nhare dzinoti: 0772 572 497

Share This:

Sponsored Links

We value your opinion! Take a moment to complete our survey