Kwayedza
ZIMBABWE Newspapers (1980) Limited yakagadza VaDelma Lupepe sasachigaro wayo naVaPikirayi Deketeke sachamagwiza wekambani inova murigadzose mubhizimusi rezvekuburitswa kwenhau nekudhindwa kwemapepanhau iyi.
VaLupepe, avo vanova nyanzvi munyaya dzemabhizimusi nemabasa anobatsira nharaunda, vari kutsiva Dr Charles Utete, avo vakasiya chigaro mwedzi wadarika.
Lupepe
VaDeketeke vari kutora chigaro chakasiiwa naVaJustin Mutasa, avo vakasiya basa gore rapera.
VaDeketeke vasimukira kusvika pachigaro chepamusoro muZimpapers ichi mushure mekutanga kushanda semutori wenhau weThe Sunday Mail muna 1987. Vakazokwidziridzwa kusvika pakuva mupepeti weThe Herald muna Kurume 2001, chinova chigaro chavakashanda kwemakore masere.
“Mumwedzi waChivabvu 2009, vakaitwa Group Editor-in-Chief apo vaiona nezvekufambiswa kwenhau kwakanaka muZimpapers,” chinodaro chinyorwa cheZimpapers.
Apa VaDeketeke vakava nebasa guru rekuona kufambiswa kwezvenhau mukambani yose yeZimpapers. Vakazokwidziridwa kuve Chief Operating Officer mumwedzi waChikunguru 2011 apo vakaramba vachishanda saEditor-in-Chief.
Panguva yose iyi, VaDeketeke vakatungamirira mukuparurwa kwemimwe mikana yebasa muZimpapers yakaita sekuvambwa kwemapepanhau anoti H-Metro neB-Metro, nhepfenyuro yeStar FM pamwe nekupihwa kwakaitwa kambani iyi rezinesi rekutanga imwe nhepfenyuro kwaMutare, yeDiamond FM.
Mamwe emabasa avakashanda zvakasimba kuparurwa kwedandemutande renhau dzezvemabhizimisi reBH24, rezvemitambo Sports Zone pamwe nenhau dzinotumirwa kuvanhu kuburikidza nenharembozha, dzeMobile News.
Zimpapers, iyo iri pamusika mukuru wemabhizimisi weZimbabwe Stock Exchange, ndiyo huru yadzo munyika munyaya dzekudhindwa kwemapepanhau zvose nekuburitswa kwenhau.
Kunze kwemapepanhau maviri anodhindwa nerurimi rwaamai, reKwayedza neUMthunywa, Zimpapers ine mamwe anosanganisira matatu anobuda zuva nezuva anoti The Herald, H-Metro neChronicle. Ine mamwe anodhindwa kamwe chete pasvondo anoti The Sunday Mail neSunday News uye Manica Post iri kwaMutare neB-Metro iri Bulawayo. Yakabatana neNew Era Group yekuNamibia, Zimpapers inodhinda zvakare bepanhau reSouthern Times.
