Kwayedza
KUCHANGE kuri kumakuwerere svondo rino nemusi weMugovera paGlamis Arena muguta reHarare uko zvikwata 10 zvemagitare zvekumapurovhinzi akasiyana zvichakwikwidza mumakwikwi eChibuku Road to Fame Finals.Makwikwi aya akatangira kumapurovhinzi uko zvikwata zvaikwikwidza zvichirwira kuzopinda mufainari iyi.
Dopiro reChibuku Road to Fame rinozivikanwa zvikuru nekusimudzira zvikwata zvakasiyana izvo zvinosanganisira Mokoomba, Club Shanga naRomeo Gasa uyo anotsigirwa nechikwata cheExtra Valembe.
Zvikwata zviri kutarisirwa kukwikwidza kufainari yegore rino zvinoti Kupenya Stars icho chichange chakamirira Bulawayo, Murinye Express (Midlands), Sunrise Jazz Band (Manicaland), RJ Zvavapachena (Mashonaland Central), Zondamthakanthi (Matebeleland South) neAdequate Sounds (Harare).
Zvimwe ndezvinoti Orchestra Mafarochete (Masvingo), African Roots (Mashonaland East), Jazz Crooners (Mashonaland West) neShantani Band (Matebeleland North).
Vaimbi vane mukurumbira vanoti Jah Prayzah, Alick Macheso, Winky D, Gasa naJeys Marabin vanotarisirwa kunge vachizoridza vachitandadza veruzhinji panopera dopiro iri.
Muhurukuro naGasa, anoti anofara zvikuru kugara achishevedzwa kuzoridza kuChibuku Road to Fame sezvo makwikwi aya ariwo akamusimudzira mumhanzi.
“Chinhu chinondifadza gore negore pose pandinoshevedzwa kuti ndiende kunoridza kuChibuku Road to Fame nekuti pasina makwikwi aya ndingadai ndisiri pandiri iye zvino.
“Ndinokurudzira vamwe vaimbi vechidiki kuti ngavashande nesimba varwire kuhwina kuChibuku Road to Fame nekuti hupenyu hwavo hunogona kushanduka,” akadaro Gasa.
