Uncategorized

Matsvakiraiuno nemuthimba

01 Dec, 2017 - 00:12 0 Views

Kwayedza

NDAUWE ndauwe, vaManyika vangoti: Nyama yedu shewe! Tinobonga kukumana ngemukuwo uno wetinoreketa ngetsika nemagariro edu echiNdau. Chinodakadza chiNdau chedu ichi. Ngatichirekete atei chabude masodzi emene.

Pupu gwendere anhu eiruke maswa, ndakachiona ngemadziso angu aya, anaMbuya Mariya naana Mbuya Johwani eizviita mumakanyimwo. Pupu gwendere antu eitambe mutshongoyo kwaChecheche nemakhwaya iyo dera kwaMuroti. Aiya mazuwa acho, dai makarekarewo aipetukirwa, taingafa ngekutseperwa ngekudakara akhiti woye.

Hino ungachachida chaayo ichi nyamashi, kuti makhwaya dzaa ngoma dzemuredhiyo nepachivhitivhiti, zvakaoma, zvikukutu mbuya yatereka kondo yeiti ijongwe. Makhwaya emakorewo ndiwo akabare nyika yetinayo nyamashi. Zviro zveeshe zvaiya zvakafishwa ngemumakhwaya kana kuti makhisimusi.

Tichazoreketa ndizvo ngerimweni zuwa. Makhwaya aya ainga akapararira nenyika yeeshe, chaiti kudakadza, aiya akaberekana nematongerwo enyika mukorewo.

Bvunzai asharuka emene, anomuronzera chendinobhuya panochi.

Nyamashi tinode kureketa ngemagama mairi: matsvakiraiuno nemuthimba. Matsvakiraiuno munhu waitumwe kumhatso kwemusikana uya unonga atizira kubudikidza ngekufohla. Wauyazve muzakazi kubudikidza ngenjira iya yekufohla yetakambobhuya ndiyo iya. Dengedenge waamwo mumhatsomwo mwaana Chirandu, mirandu yeeshe yaizwa yekuashire muzakazi.

Kunotumwe mwamuna umwe unoguma eidaidzira ari kubanzi kwemhatso eiti: Tsvakirai uno kwaPenesera, kwaPenyai kana kwaTholana, kuti kuriyo kwaatizira musikanawo. Photophoto kudaidzira kwaakurumbe kupetuka, ukabathwa, bhasope kupondwa wena, ndicho chiNdau chacho akhiti woye.

Adaidzira kudaro, aya ari mumhatso atozwa, atoziya kuti ndiro doodzi racho raa pano. Ngatisariyarwa kuti anhu airoorane ematongo. Kazhinji kacho munhu uyu waienda ari madeikoni, kwandoti tsvaa-a, nekuziye kuti nguwadzi antu aringana mumizimwo.

Kana wadaidzira kudaro, watoziye kuti soko razwika raguma. Izvi zvaiizirwe kuti antu asazoti mwana wedu hino uri kuri kunyangarika ere, wakaonana nechakanganyi.

Kana zvadai zviya munhu weshe mhumba yagarisika, kubvira ndimwi ananyakutizirwa atei kune anikazi emukunda.

Izvi zvoizwa nyamashi izvi, zvekugumane makotsi pasina matsvakiraiuno, itai henyu munoti amubviri asi uchandokumana nacho badzi. Zviro ngazvihambe ngemurandu anaChirandu woye, anaMhlanga woye. Ngatizwisisane apapo, kuradze munya kupangana akhiti.

Pane angade kureketa naPenyai ngatidhibhane pa0772 332 645 kana 0712 948 959.

Share This:

Sponsored Links

We value your opinion! Take a moment to complete our survey