Kwayedza
. . . ndokunozvipira kumapurisa
Kingstone Mapupu —
MUKADZI wekuEpworth — uyo anozviti iye nechikwata chevamwe vake vanoroya — nguva pfupi yadarika akapotsa “azvimbirwa” nenyama yevanhu vavakauraya apo akashaya zvekuita nenhindi kana kuti zvipisi zvenyama yevashakabvu iyo yaiva mumba make.
Stella Gondo (50), uyo anogara pa188 kuMuguta, kuEpworth, akazvimbirwa nenyaya yenyama yevanhu zvekusvika pakunozvipira kumapurisa ekuDomboramwari achida mazano.
Mukadzi uyu akaudza Kwayedza kuti akaburitsa nhindi nomwe dzenyama mumba make — idzo dzinove dzemitumbi yevanhu vana avo vavakauraya nevamwe vake.
Chakaita kuti nyaya iyi izosvika kumapurisa ndechekuti mukadzi uyu nevari kumubatsira vaida kuziva kuti voita sei nenyama dzevanhu idzo dzavakazopisa —asi dzamboita mazuva vasingazive zvekuita nadzo.
Stella ari kushandirwa kubvisa shavi rehuroyi riri paari neimwe n’anga iyo yaanoti ndiyo yakazomubatsira kupisa nhindi dzenyama yevanhu idzi.
Asi vasati vaipisa, mukadzi uyu nen’anga yacho vakatombozvimbirwa nenyaya yenyama yevanhu iyi sezvo vaishaya zvekuita nayo vachizeza kupara mhosva.
Vachibvunzwa, mutauriri wemapurisa munyika, Chief Superitendent Paul Nyathi, vanoti vanoda nguva yekuita tsvakurudzo yemafambiro ari kuita nyaya iyi.
Stella anoti svondo rapera pamberi akaenda kumba kwavo nen’anga iri kubatsira mhuri yavo, Mbuya Rosemary Marumba Soko (37), ndokunopinda mumba make umo akanoburitsa nhindi dzenyama nomwe dzaiva neruvara rwegreen.
Anoti nyama iyi ndeye mitumbi yevanhu vana avo iye nevamwe vake vavakauraya, vanosanganisira mwana mucheche uyo anonzi akafa netsaona apo aibva kuSouth Africa naamai vake vaine motokari yavo itsva yerudzi rweMercedes Benz.
Dzimwe nhindi dzenyama yevanhu iyi dzinonzi dzakambenge dzachererwa pachivanze chepamba pevabereki vaStella, iko kuEpworth, apo iye anogara naamai vake — Mbuya Idah Gondo (80).
Stella anoti: “Ndakaenda naMbuya Marumba kumba kwedu tikanoburitsa nyama yevanhu avo vatakauraya nevamwe vangu mumba mangu.
“Nyama iyi ndainge ndakaiisa pasi pemubhedha, ndeye vanhu vandakauraya nevamwe vangu. Inyama yevanhu vakuru vatatu nemucheche mumwe chete.
“Pane bhodhoro rine ropa revanhu vataiuraya nezai mukati, iro ratakachengeta kubva 2006 uye raiva pakati pechivanze randakabvisa zvose neshamhu yataivhurisa makuva.
“Izvozvi Mbuya Marumba vari kundishandira kuti shavi rehuroyi riri pandiri ribve.”
Nyama yakaburitswa naStella inonzi ndeye panhengo dzemuviri dzinoti pachidya, paruwoko nepabendekete kubva pamitumbi yevanhu vose vari vana.
“Nyama dzevanhu vatakauraya ndakadzitora pasi pemubhedha mumba mangu ndichibatsirwa naMbuya Marumba, avo vakazodzipisa. Izvi zvinogona kureva kuti shavi rangu rekuroya rava kuzopera,” anodaro Stella.
Anoenderera mberi achiti: “Gate rataishandisa sevaroyi handichaziva kwarakaenda sezvo rakabviswa nevamwe vangu rikanovigwa.”
Mukadzi uyu anoti zvimwe zvinhu zvavanoshandisa pakuroya zvaakaburitsa musi uyu ihari yakanyorwa mazita evanhu vedzinza rake.
“Pandaisundwa nesimba rambuya ava kuti ndiburitse zvinhu zvose mumba umu, nyoka yatinoshandisa yakatiza. Ine simba guru uye yakapinda nemukati mevanhu vaivepo,” anodaro Stella.
Zvimwe zvinhu zvinonzi zvakaburitswa naStella zvinosanganisira chuma chakangofanana nechinopfekwa muchiuno nevanhukadzi — mukanda — nemishonga yaive muwodhiropu izvo zvinonzi vaishandisa.
Pashure, nyama yevanhu iyi inonzi yakazofukunurwa payainge yambofushirwa, ndokupiswa naStella nen’anga iyi.
Stella akafumura mabasa ake ekuroya nevamwe vake mushure mekunge mumwe wevanin’ina vake arwara apo aibatwa nemweya waiti waibva kune mumukadzi uyu uchiti unoda kuti afe.
Mukadzi uyu anotizve pavanouraya vanhu vanoitisa chadzimira kuhama dzevashakabvu kuti vavige zvipuka zvakaita sembwa panzvimbo yemutumbi wemunhu apo varoyi vonotora mufi vachishandisa mishonga.
Mbuya Marumba vanotsinhira kuti vakabatsira Stella kubvisa ndokuzopisa nyama yevanhu iyi mushure mekunge vatanga vamhan’ara nyaya yacho kumapurisa.
“Stella akapinda mumba maanorara mushure mekubuda kweshavi rake rehuroyi ndokunotora oga nhindi dzenyama iyi. Akati inyama yevanhu vaakauraya nevamwe vake.
“Akatizve aiva asiya dzimwe nhindi ina idzo dzaaida kuzoburitsa pamwe chete nenyoka yaanoti anogara nayo mumba umu.
“Nyama iyi akaitakura akaiisa mupepa rechikweshe akamboicherera pakati pechivanze.
‘‘Takazoenda kumapurisa ekuDomboramwari (kuEpworth) kunomhan’ara nyaya iyi. “ vanodaro Mbuya Marumba.
Vanoenderera mberi vachiti: “Nyama iyi takazoipisa asi chasara inyoka iyo inoda kuti ibatwe. Takatanga tazivisa mapurisa ekuDombo, kuno kuEpworth, ndokuzopisa nyama iyi, sezvo iri yevanhu.”
Vamwe vanoti vaivepo paiburitswa zvinhu zvehuroyi naStella izvi vanosanganisira Edison Marumba (29) naPrecious Marumba (40).
Mbuya Gondo vanoti nyaya inotaurwa nemwana wavo yehuroyi iyi inotoda kuti mhuri yavo ibatsirwe sezvo pasina zvavanoziva zvizere pamusoro payo.
Zvakadai, vamwe vemhuri yekwaGondo svondo rakapera pamberi vakaungana kumba kwaStella vachida kuona kubviswa kweshavi rehama yavo.
Pakupera kwegore radarika, Stella akabuda muKwayedza achidura kuti anogara nemutumbi wechitunha chemunhu muwodhuropu yake uye ane chiwoko chekamwana kacheche ako kavakauraya nevamwe vake icho chaanoshandisa semugwaku.
