Kwayedza
‘Mumwe musi akapotsa anditsvoda’
Tafadzwa Mutsotso
MWANAKOMANA wekushaya hunhu zvekusvika pakuchiva amai vake, achivabata-bata kuti vashinhe naye, akazoguma aendeswa kumatare edzimhosva.Tutsirai Zhemi akamhan’arira Tawanda Zhemi (23), anove mwana wemurume wake, kuHarare Civil Court achiti amushaisa rugare kumba sezvo achimuvhurira hwindo otanga kutaura zvinyadzi nekumukumbira rudo.
“Rimwe zuva akatombondivhurira hwindo remumba mandinorara akatanga kutaura zvinyadzi achiti, ‘Amai ndinotoda kumbonzwawo kuti zvakamira sei’. Anotaura zvinyadzi zvisingaite kana kuti ndizvitaure pano. Haambondiremekedzi saamai vake,” akadaro Tutsirai.
Akati ave kutotya kuti Tawanda anogona kupedzisira amubata chibharo. “Mwana iyeye ane zvivindi, achandibata chibharo chete. Rimwe zuva akandibata-bata ndikatozoita zvekumuvhazurira uko apo akanga oda kutonditsvoda.
“Mambo wangu, ndibatsireiwo mwana iyeye ibhinya chairo. Ndiko kusaka ndauya kuzopoterawo kuno kudare kuti mundidzivirirewo,” akadaro.
Akaenderera mberi achiti Tawanda akatombomurova zvekumukuvadza mushure mekunge amutuka apo akange akumbira kushereketa naye.
“Chero zvazvo ndisiri amai vake vekumubereka, anofanira kungoremekedzawo kuti ndiri mudzimai wababa vake, nekudaro nditoriwo mubereki wake. Akandirova ndikatonorapwa kuParirtenyetwa (Group of Hospitals) mushure mekunge andikumbira rudo ndikamutuka,” akadaro Tutsirai.
Tawanda haana kuenda kudare kuti anopawo divi rake panyaya iyi.
Mutongi Yeukai Dzuda akapa Tutsirai gwaro redziviriro.
