Kwayedza
VARIMI vakakurudzirwa kuti vavandudze mabasa avo kuburikidza nekurima mbesa dzakasiyana dzakauchikwa nenyanzvi dzakaita semuriwo nenyemba nedonzvo rekuti vawane goho rinogutsa.
Kurudziro iyi yakaitwa nguva pfupi yadarika nemunyori mukuru mubazi rezvekurima nekuvandudzwa kwemichina yemadiridziro VaRingson Chitsiko apo vaimema mbesa dzakauchikwa nekambani yePrime Seed Co kumapindu ekuStapleford Research Station.
VaChitsiko vanoti varimi vanofanira kutora mukana wekusimudzira mabasa avo nekudyara mbeu dzinouchikwa nemakambani akaita sePrime Seed Co sezvo dzichienderana nevhu remunyika ino pamwe chete nemamiriro ekunze.
“Kambani iyi haingogadziri mbesa zvisina hunyanzvi mukati asi kuti inanamazvikokota vanotora nguva yavo kusvika vazotaura kuti mbesa imwe neimwe inoita kuti irimwe nemurimi anoda kutengesa zvirimwa zvake kune veruzhinji. Varimi vanofanira kutora mukana uyu wekudyidzana nanamazvikokota ava mukusarudza mbesa dzekurima. Varimi veminda midiki kana mihombe vose vanofanira kuva neruzivo rwakakwana rwekurima sezvo zvirizvo zvinobudisa goho rakanaka. Nekuda kwekushomeka kwemvura nekusanduka kwemamiriro ekunze, varimi havasi kubuda negoho rinogutsa nyika naizvozvo vanofanira kuva neruzivo rwakakwana,” vanodaro VaChitsiko.
Varimi, vanodaro VaChitsiko, vanofanira kurima zvine hunyanzvi senzira yekuderedza kutengwa kwechikafu chekune dzimwe nyika kwakanyanya.
“Zvirimwa kana chikafu chiri kubva kune dzimwe nyika zviri kuti wandei nekuti varimi vemuno havasi kurima zvinogutsa nyika yose. Kugona izvi kuziva marimiro nenguva dzekurima pamwe chete nembesa dzekurima kunzvimbo kwatinenge tiri sevarimi. Varimi torai mukana wemakambani anouchikira mbesa muno nekushandisa ivhu ramunaro zvakakwana nekuti zvirimwa zvagara zvinowana vanotenga, kunyanya zvemumapindu zvinodiwa pakudya kunovaka miviri neveruzhinji,” vanodaro.
VaChitsiko vanoti Hurumende yakazvipira kubatsira varimi nevamwe vari mune zvemabhizimisi anodyidzana navo mukurudzira kurimwa kunogutsa nyika.
Hurumende, vanodaro, icharamba ichitsigira mabasa ekurimwa sezvo ariwo hwaro hwekuvandudza upfumi hwenyika.
Vachitaurawo pachiitiko ichi, deputy managing director wePrime Seed Co, VaPatrick Mutandwa, vanoti kambani yavo iri kushanda nesimba mukuuchika mbesa itsva yemiriwo pamwe chete nezvimwe zvirimwa zvemumapindu.
“Kuvandudza kwedu mbeu dzemuriwo nezvimwe zvirimwa zvemumapindu kunoitawo kuti varimi vave nesarudzo dzakasiyana mukurima kwavo zvichibatsira kuwedzera huwandu hwevarimi. Izvi zvinozoita kuti nyika igute nezvirimwa zvayo kwete kutenga kunze. Mbesa dzatriri kuvandudza dzinosanganisira muriwo werape, cabbage nenyemba dzemhando yakasiyana.
“Izvi tiri kuzvivandudza kuti zviite nguva diki zvisvike pakudyiwa nekukohwiwa pamwe chete nekuwedzera kunaka kwazvo pakudyiwa,” vanodaro.
