Kwayedza
Abel Ndooka —
MUBVUNZO mukuru uri pamiromo yevatsigiri venhabvu vazhinji vemuno ndewekuti zvikwata zvenhabvu zvinoti CAPS United neNgezi Platinum izvo zviri kukwikwidza mumitambo yemuAfrica zvichakwanisa here kusvika kufainari yemitambo iyi?
Zimbabwe gore rino iri kumirirwa neCAPS United mumutambo weCAF Champions League kozoti neNgezi Platinum muCAF Confederation Cup.
Gore negore tariro yevatsigiri vemuno inenge iri yekuona zvikwata zvavo zvichisvika kufainari yemutambo uyu kana kumbohwinawo sezvakaita neMamelodi Sundowns yekuSouth Africa iyo yakatora mukombe weChampions League mushure mekunge yakunda Zamalek Sporting Club yekuEygpt.
Pazvikwata zvakwanisa kukwikwidza mumutambo uyu zvemuno, hapasati pawana chinodarika pakasvikwa neDynamos FC iyo yakapinda mufainari yemutambo uyu mugore ra1998. Zvisinei, Dynamos yakazokundwa neAsec Mimosa yekuCote d’Ivoire 4-2.
Mufainari yeCAF Campions League neCAF Confederation Cup, zvikwata zvose zvinowaniswa mukana wekutambira pamusha apo panenge paine vatsigiri vazvo.
Lloyd Chitembwe anove murairidzi weCAPS UNITED naTonderai Ndiraya weNgezi Platinum Stars vose vari kufanirwa kukwidziridza masokisi avo kana vachida kufambira mberi mumutambo uyu nekuti mumitambo yezvikwata izvi yesvondo rapera yakapera iri mangange.
Kepe-kepe – sezita remadunhurirwa reCAPS United – yakaita 0-0 neLioli yekuLesotho uye iri kufanirwa kuzvambaradza chikwata ichi svondo rinotevera pazvichasangana muno kuti iwane mukana wekufambira apo inozosangana neTP Mazembe yekuDemocratic Republic of Congo.
Ngezi Platinum Stars yakaita mangange zvakare 1-1 nePamplemousse yekuMauritius.
Chikwata ichi kana chikahwinha mutambo wacho uyo uchatambirwa muno chinozosangana neRecreativo do Libolo yekuAngola. Chamangwiza weCAPS United, Cuthbert Chitima, anoti shuviro yechikwata chavo kubudirira kuenda kumagroup stages uko kwakatarisirwa kusvikwa nezvikwata zvizhinji.
“Chekutanga tinofanirwa kutanga tasvika kumagroup stages ndiko kunodiwa nemunhu wose.
“Ipapo zvikwata zvose zvinenge zvave kukutarisai nekuti munenge mave nemukana wekusvika kufainari,” anodaro.
Kepe-kepe ikakwanisa kukunda Lioli pavachasangana svondo rinotevera inobva yawana mukana wekusangana neTP Mazembe yekuDRC iyo yakambohwina Champions League kashanu.
Chitima anoti havatye kana vakasangana neTP Mazembe nekuti chikwata chake ishashawo zvakare.
“Handiti TP Mazembe ishasha yekuDRC?
“Isu tiri shasha yemuno, saka takangofanana nekuti ishasha dzinenge dzave kusangana,” anodaro Chitima.
Zvakadai, munhoroondo yenhabvu yemuZimbabwe, zvikwata zviviri chete zvinoti Dynamos FC neMonomotapa ndizvo zvakakwanisa kurwa kusvika kumagroup stages emutambo uyu.
Dynamos payakasangana neAsec Mimosa – apo yairairidzwa naSunday Chidzambwa – mutambo wekutanga wakatambirwa muno kunhandare yeNational Sports Stadium wakapera uri mangange 0-0 asi ndokuzonokundirwa 4-2 kuAbidjan.
DeMbare zvakare yakazosvika musemi-fainari yemutambo uyu mugore ra2008 ichirairidzwa naDavid ‘Yogi’ Mandigora apo yakazotadziswa kupinda mufainari neCoton Sport yekuCameroon.
Highlanders FC yakaedza kashanu asi pose yaingoburitswa muround one yemutambo uyu apo zvikwata zvinenge zvichirwira kuenda kumagroup stages.
Kepe-kepe gore rino richange riri rechitatu ichiedza mhanza mumutambo uyu, sezvo yakamboupinda kaviri ndokuburitswa isati yasvika kure.
Mugore ra2005, yakaburitswa muround rekutanga kozoti 2006 yakatoburitswa zvachose mushure mekunge yatambisa mutambi aive asina kunyoreswa mumitambo iyi.
Zvimwe zvikwata zvakaita seGunners zvakamboedzawo raki mugore ra2010 asi yakaburitswa mushure mekunge yakundwa neAl Ahly muround rekutanga.
Kozoti Motor Action, mugore ra2011 yakaburitswa neAsec Mimosa mumutambo uyo wakazosvika kumapena mushure mekunge wapera uri mangange 0-0 muno pamwe nekuAbidjan.
