Kwayedza
MUIMBI weAfro-Pop neJazz, Tich Mutodi, uyo anotsigirwa nechikwata cheNzukwa Identity Band okurudzira vaimbi vemusambo uyu pamwe nesungura kuti vabatane pakuita mashoo nedonzvo rekusimudzirana. Panguva iyo kushomeka kwemari munyika kuri kutadzisa vamwe kuita mashoo, Mutodi anoti vaimbi vose vakabatana pakuita mashoo zvinogona kuvabatsira sezvo vatsigiri vachiuyawo vakawanda. “Hatingade kunyeperana, zvinhu hazvina kumirira vaimbi vakawanda zvakanaka parizvino kunyanya isu tinenge tichisimukira, kushaikwa kwemari kuri kudzorera basa redu kumashure.
“Vaimbi vemisambo yakasiyana tikaronga mashoo edu takawanda zvimwe zvingatibatsire tose tikawana mukana wekuridza kwete kuti ini ndiri kuridza apo mumwe ari pabhawa rimwewo.
“Semuenzaniso, tarirai vapfana veZim-dancehall vanoridza vakawanda uye kumashoo kwavo kunogara kwakazara saka tikaita zvimwewo isu vesungura nejazz ndinoona tichibudirira zvikuru,” anodaro Mutodi.
Mutodi – uyo anozivikanwa nenziyo dzake dzakaita mukurumbira dzinoti Mbona-Mbona, Ndapera Nyasha naBabamukuru dziri padambarefu rake rekutanga rinonzi Ndapera Nyasha – parizvino ari kunetsa nekambo kanonzi Zadza Mukombe.
