Kwayedza
Daphne Machiri —
ZVAKAKOSHA kuti vana vechikoro, zvikuru vegwaro reECD, vadzidziswe makombiyuta kuburikidza nechirongwa cheE-learning kuitira kuti vakure vachifambirana nenguva.
Kurudziro iyi yakaitwa nemukuru wesangano rakazvimirira, reDzidzo Inhaka – VaShepherd Chimururi – muhurukuro neKwayedza nguva pfupi yadarika.
Vanoti sangano ravo riri kupinda muzvikoro pamwe nemumakireshi richidzidzisa vana makombiyuta.
“Nyaya iripo ndeyekuti vana vechikoro vasabatira ruzivo rwemakombiyuta pamusoro, vanofanirwa kukura vaine ruzivo rwemakombiyuta kubvira padanho reECD sezvo achishandiswa kusvika kumayunivhesiti nemumabasa,” vanodaro.
Vanoenderera mberi vachiti: “Takatarisana neNew Curriculum iyo inokurudzira chirongwa cheE-learning, saka isu tiri kufambirana nechirongwa ichi.”
Vanoti pasi pechirongwa chavo, vari kubatsirawo zvimwe zvikoro zviri kumaruwa.
“Hatisi kusimudzira zvidzidzo zvemakombiyuta muzvikoro zvemumaguta chete asi kumaruva tiri kusvika zvakare. Mwana wese ane kodzero yekuwana ruzivo, zvisinei nekuti ari kumaruwa kana kudhorobha,” vanodaro VaChimururi
Vanoti gore roga-roga vanoita makwikwi evana vekireshi ezvidzidzo zvekushandiswa kwemakombiyuta.
“Tinoita makwikwi ekushandisa makombiyuta gore roga-roga apo vana vekireshi vanenge vachivaka mazwi, kupenda mifananidzo yemhuka nezvimwe zvakasiyana zvezera ravo,” vanodaro VaChimururi.
