Vatambi vetsiva vonorwa kuMalawi

01 Oct, 2015 - 00:10 0 Views
Vatambi vetsiva vonorwa kuMalawi

Kwayedza

VATAMBI vetsiva vatanhatu vemumapoka akasiyana avo vari kutarisirwa kunokwikwidza kumutambo weKnock Out Malaria in Malawi, kunyika yeMalawi munguva pfupi iri kutevera vakatanga gadziriro dzavo svondo rino.

Mutambo uyu uchaitwa musi wa31 Gumiguru uye uchange uine vatambi 20 vachabva kunyika dzinoti Zimbabwe, Malawi, Zambia, Tanzania, South Africa, Namibia, China, Brazil, Botswana neDemocratic Republic of Congo.

Vatambi vanoti Thamsang Dube (heavyweight), Noel Mpofu (heavyweight), Lawrence Moyo (welterweight), Diana Makumbe (bantamweight), Tinashe Madziwana (super-bantamweight) naKudakwashe Chivandire (flyweight) vari kutarisirwa kupinda mukembi svondo rino muHarare apo vachange vachishanda neshasha dzekurairidza tsiva dzinoti Denver Wyne, Issa Phiri naSimon Sangulani.

Puromota wetsiva, Clyde Musonda, uyo anove mumwe wevarongi vemutambo uyu anoti ari kugutsikana zvikuru netarenda rine vatambi vose vachanomirira Zimbabwe kumutambo uyu.

Musonda, uyo anotungamira Deltaforce Boxing Promotions, akabatana neNo Pain No Gain Boxing Promotions yekuMalawi neHall of Fame Boxing Promotions yekuTanzania kuronga mutambo uyu.

Musonda anoti vamwe vatambi vachamirira Zimbabwe pamutambo uyu vakaita saThamsanga naMpofu vave nenguva vasati vambokwikwidza.

“Ndine chivimbo chekuti vatambi vetsiva vedu vemuno vatanhatu avo vatinoda kutumidzira kumutambo weKnock Out Malaria in Malawi vachatanga gadziriro dzavo svondo rino.

“Vachange vachibatsirwa kuita gadziriro dzavo naDenver Wyne, Issa Phiri naSilas Sangulani avo vane mukurumbira wekubikwa vatambi vetsiva vakawanda.

“Kubva svondo rino kusvika vaenda kumutambo uyu vachange vachishanda zvakasimba nekuti vamwe vacho vanoti Thamsanga Dube naNoel Mpofu vane ngura mumutambo uyu sezvo vave nenguva refu vasati vambokwikwidza,” akadaro Musonda.

 

Share This:

Sponsored Links

We value your opinion! Take a moment to complete our survey