Kwayedza
Mathew Masinge
SANGANO reNational Blood Services Zimbabwe (NBSZ) rinoti vechidiki, zvikuru vari kuzvikoro zvesekondari nemayunivhesiti, ndivo vari pamberi munyaya dzekupa ropa pachena munyika muno.
Vachitaura nguva pfupi yadarika pakupihwa kwemenduru kune vanopa ropa muHarare, mukuru weNBSZ, Muzvare Lucy Marowa, vakatenda vose vari kupa ropa pachena vachiti riri kubatsira varwere zvikuru.
“Ropa redu rakawanda tinoriwana kubva kuvadzidzi vari kusekondari nekumayunivhesiti. Kazhinji tinozowanzosangana nedambudziko rekushomeka kweropa apo zvikoro zvinenge zvavharwa,” vakadaro Muzvare Marowa.
Vanoti vari kuita zvirongwa zvekutiwo madzimai nevamwe vechikuru vapinde mukupa ropa pachena.
“SeNBSZ, tinogara tichiita zvirongwa zvekukurudzira madzimai nevamwe vechikuru vanoshanda mumakambani ane vashandi vakawanda kana mumakereke kuti vapewo ropa pachena kuitira kuti tigare tiine ropa rakawanda,” vanodaro.
Zvichakadai, VaLeo Ngezimani (49) naVaCharles Cockram ndivo vakawana mibairo mikuru yekupa ropa pachena zvichitevera kupa kwavakaita ropa kanodarika ka150 pamumwe nemumwe wavo.
VaNgezimani, avo vanoshanda samakanika kuCentral Mechanical Equipment Department (CMED) muHarare, vanoti vanofara zvikuru nekupa ropa pachena kwavanoita sezvo zvichibatsira varwere.
“Ndinonzwa kufara chaizvo muzuva ranhasi nokuti ndapfuura kazana rimwe chete nemakumi mashanu ndichipa ropa pachena. Mufaro wangu uri pakuti ndiri kuyamura vanhu vazhinji munyika muno uye semunhurume ndakwanisawo kuzvichengetedza kusvika pari nhasi” vanodaro VaNgezimani.
Vanoti kunyangwe mhuri yavo isingazvinzwisise, vacharamba vachipa ropa sezvo iye zvino vakasarudzwa semumwe wevapi veropa vakuru, Apherisis Blood Donor.
“Mudzimai wangu pamwe chete nevana havasati vave kutombonzwisisa kuti sei ndichipa ropa sezvandinoita.
‘‘Vanotozvitarisira pasi asi ndinovimba nerimwe remazuva vachazviona kuti sei ndichidai.
“Iko zvino ndatova Apherisis Donor zvichireva kuti ndava kutopa mapaindi akawanda kamwe chete nekuti ropa rangu rakachenesesa,” vakadaro.
