Kwayedza
Daphne Machiri
MASANGANO akasiyana ari kubatana mukudzidzisa vana vechikoro kukosha kwekuchengetedza zviwanikwa zvakaita semasango, mhuka, ivhu pamwe nemiti pasi pechirongwa cheEco-Schools Programme. Chirongwa ichi chiri kutungamirirwa neMukuvisi Woodlands yabatana nemamwe masangano anosanganisira Evironmental Management Agency (EMA), Zimbabwe National Water Authority (ZINWA), National Parks and Wildlife Management Authority, European Union, Practical Action neUnicef
Zvikoro zvinodarika 70 kubva kumatunhu akatsaukana eZimbabwe sekuManicaland, Mashonaland West, Mashonaland East neHarare zvakasangana muHarare nguva yadarika pazuva rekucherechedza kukosha kwekuchengetedza zviwanikwa.
Muhurukuro neKwayedza, regional director wePractical Action, VaKudzai Marovanidze, vanoti chirongwa ichi chakakosha sezvo vana vachidzidziswa zvakawanda pamusoro pekuchengetedza zviwanikwa.
“Nharaunda inofanirwa kuchengetedzwa zvakanaka nekuti upfumi hwenyika hunobva mukuchengetedza zviwanikwa zvakaita semhuka, zvicherwa pamwe nemasango,” vakadaro.
Vanoti vari kudzidzisa vana zvakare pamusoro pekusanduka kuri kuita mamiriro ekunze sezvo izvi zvichikanganisa kunaya kwemvura nekudaro vanofanira kukura vaine ruzivo pamusoro pemamiriro ezvinhu.
“Tinokurudzira kuti vana muzvikoro vave nemakirabhu ekusima miti, kunhonga marara, kurima nekuchengetedza ivhu,” vakadaro VaMarovanidze.
