Kwayedza
Kingstone Mapupu
Kanzura wekuMukumbura, kudunhu reMt Darwin, ari kutungamirira mukurimwa kwemapindu (magadheni) apo mari inowanikwa mukutengeswa kwezvirimwa inozobhadharirwa vana vechikoro vanoshaya nekuvatengerwa mabhuku, mayunifomu nezvimwewo zvinodiwa pakudzidza.
Kanzura Fungai Mavhura (35) vekuwadhi 34 kuKamutsenzere vanoti semunhu wechidzimai, vakatanga chirongwa ichi mushure mekubatikana nenyaya yevana vanobva kumhuri dzinoshaya avo vakawanda vavo vaitadza kuenda kuchikoro nechikonzero chekushairwa mari.
“Mushure mekunge ndagara pasi nevabereki nevakuru vezvikoro, zvakabuda pachena kuti kune vana vakawanda vaitadza kuenderera mberi nechikoro nekuda kwekushaya mari.
“Takazobatana nemamwe madzimai ndokutanga mapindu anodarika gumi muno ayo tinorima tichitengesa zvirimwa, tobhadharira vana vanobva mumhuri dzinoshaya imwe mari yechikoro, imwewo madzimai aya ogovana,” vanodaro.
Vanoti munzvimbo yavanomirira, mune nzara nekuda kwekusanaya kwemvura zvakanaka izvo zvakatadzisa chibage kuita.
“Takatsvaga mapindu ane mvura pedyo ayo madzimai ari kurima zvinosanganisira muriwo, derere, matomatisi, bhinzi nezvimwe. Chirongwa ichi chasimudzira raramo yemadzimai nemisha yavo zvikuru,” vanodaro.
Mamwe emapindu ari kurimwa achibatsira vana vechikoro anosanganisira Hode Project, Zambara neMapetura.
“Tinotengesa zvirimwa izvi toisa mari yedu muhomwe mbiri dzinoti inogovanwa pakati penhengo, imwewo yoendeswa kuzvikoro kunobhadharira Vana vanoshaya avo vanosarudzwa nevabereki nevakuru vezvikoro,” vanodaro kanzura Mavhura.
Zvichakadai, vanoti vari kupemha rubatsiro kubva kuvanhu vakazvimirira nemasangano akasiyana kuti vawaniswe mainjini ekudhonza mvura kuti basa ravo rivarerukire.
“Ndakanyorera matsamba kumasangano akasiyana kuti tiwaniswe mainjini nemapombi ekudhonza mvura mumatsime nezvibhorani zvatinoshandisa kuitira kuti basa riite nyore uyewo zvinoita kuti tirime mapindu akakura,” vanodaro.
Vamwe vevana vari kubatsirwa ndevepazvikoro zvinosanganira Kamutsenzere Primary, Zambara Primary neGomo Primary. Sachigaro wechirongwa chemapindu aya ndiVaBanny Charosa, avo vanonzi vari kufambawo mumakambani vachitsvaga rubatsiro rwekuti vakwanise kusimudzira basa ravo.
