Kwayedza
Daphne Machiri
SANGANO reCancer Association of Zimbabwe rakatanga chirongwa chekuvheneka madzimai gomarara remumazamu pachena nedonzvo rekusimudzira utano hwavo kumatunhu ose enyika. Muhurukuro neKwayedza, monitoring and evaluation officer kusangano iri, VaLovemore Makurirofa, vanoti zvakakosha kuti vanhukadzi vavhenekwe zvirwere nguva nenguva.
“Tichitarisa tsvakiridzo yakapedzisira kuitwa neveZimbabwe National Cancer Registry mugore ra2013, vanhukadzi vakaonekwa vari panjodzi huru yekubatwa nechirwere chegomarara remumazamu. Chirwere chegomarara kana chikapararira zvakanyanya zvinoreva kuti chinenge chisisiri nyore kurapika nekuti huturu hwacho hunenge hwakomba,” vanodaro VaMakurirofa.
Vanokurudzira vanhukadzi kuti vaende kunovhenekwa chirwere ichi pachena.
“Vanhukadzi vachange vachivhenekwa gomarara remumazamu rinova riri kutambudza vakawanda vavo. Donzvo rechirongwa ichi nderekuvandudza utano hwevanhukadzi,” vanodaro. Gore roga-roga, mumwedzi waGumiguru ndipo panopihwa chenjedzo kuruzhinji pamusoro pechirwere chegomarara remuzamu (breast cancer awareness month).
“Chirwere chegomarara remumazamu ndechechipiri pazvirwere zvegomarara zvinotambudza vanhukadzi pasi rose. Naizvozvo zvakakosha kuti vange vachiwana rubatsiro neruzivo ruzere pamusoro pedenda iri.
