Kwayedza
Malven Mugadzikwa
SHASHA yetsiva Alfonso ‘Mosquito’ Zvenyika svondo rapera pamberi akapihwa zvekushandisa mumutambo uyu nemapurisa eZimbabwe Republic Police nedonzvo rekuti akwanise kudzidzisa vechidiki senzira yekuti vawane zvekuita vasaita misikanzwa yekupara mhosva dzakasiyana.
Mosquito akagachidzwa zvekutambisa izvi naAssistant Commissioner Shadreck Mubaiwa.
Anoti ari kudzidzisa vechidiki mutambo wetsiva chinova chirongwa chakananga kudzivirira kuparwa kwemhosva sezvo vazhinji vavo vari kushaya zvekuita avo vanozopedzisira vava kuita mabasa asina kunaka.
“Munzvimbo yeMbare mandigere mune vechidiki vakawanda vari kushaya zvekuita. Ndakati ndimbotaurawo nevakuru vemapurisa kuti vandibatsirewo vakabatana chero nevemabhizimisi nezvekutambisa mutambo wetsiva sezvo zvichibatsira vechidiki mukuderedza kuparwa kwemhosva.
“Ndine chikwata chevechidiki chandinodzidzisa mutambo wetsiva, vandinotora avo vanenge vasina zvekuita. Ndiri kutarisira kuti ndikaramba ndichiwana rubatsiro urwu chichakurawo ndoramba ndichitora vakawanda zvekuti tinozopedzisira tava kutamba mutambo uyu takamirira chero nyika chaiyo. Ndinodawo kutenda veZRP nerubatsiro rwavandipa urwu,” akadaro Zvenyika.
Zvakadaro, Senior Asst Comm Mubaiwa vakayemura basa riri kuitwa naMosquito iri vachiti seZRP vacharamba vachimubatsira nepavanogona napo.
“Mosquito ndinomutenda chaizvo nekuti zvaari kuita izvi ibasa guru rinotibatsira isu semapurisa mukudzivirira kuparwa kwemhosva. Ticharamba tichimutsigira kuti basa rake nechikwata chake zvirambe zvichienderera mberi. Chinangwa chedu ndechekuti dai akwanisawo kubuda kunze kwenyika nechikwata chake vachimirira nyika mumutambo uyu. Dai chero vemabhizimisi vavabatsirawo kuti varambe vachiwana zvekushandisa mumutambo wavo nekuti ndizvo zvinoita kuti vaenderere mberi,” vakadaro.
