Kwayedza
Muchaneta Chimuka
CHIREVO chekuti nyadzi dzinokunda rufu chozadzikiswa nenyaya yemurume wekuChitungwiza akawanikidzwa ave kutobuda mumba mevaridzi nezvinhu zvaainge aba zvakaita kuti abatwe achibva aendeswa kumapurisa.
Takesure Dhumukwa (21) akamiswa pamberi nemutongi wedare reChitungwiza Magistrates Courts, VaBrighton Danana, achitarisana nemhosva yekuba uye kupinda muchivanze chavaridzi zvisiri pamutemo.
Mutongi Danana vakamupa chirango chekugara mujeri kwemwedzi mipfumbamwe asi ndokuzomubvisira mwedzi mitatu pachirango ichi nechitsidzo chekuti haafaniri kupara imwe mhosva yerudzi urwu makore mashanu asati adarika.Vakamubvusira mimwe mwedzi mitatu pachirango ichi nechitsidzo chekuti anofanira kuripira mumhan’ari $5 500 musi wa31 Nyamavhuvhu usati wapfuura, achibva asara nechirango chekugara mujeri mwedzi mitatu izere.
Muchuchisi Tracey Muzondo vakaudza dare kuti nomusi wa18 Chikumi gore rino nenguva dza3 masikati, mumhan’ari – Jeffery Chikwanyanga (36) – akasiya akiya misuwo yemba yake achienda muminamato.
Paakazodzoka mushure meawa, ndipo paakasangana nemashura apo akaita mahwekwe naDhumukwa achibuda mumba make akabata bhaketi rakanga riine ndiro mukati. Akabva amhanya ndomumubata achibva aenda naye kuZengeza Police Post uko akasvikoyambirwa kuti aende nemusungwa uyu kumapurisa ekuTown Centre, dhoketi richibva razonovhurwa paMakoni Police Station.
Chikwanyangwa anoti paakasiya Dhumukwa pakamba yemapurisa, akazodzokera kumba achibva aona kuti ainge abirwa zvekare mari US$40 nemakiyi maviri (padlocks) zvese zvaikosha $8 000 asi akangobura zve$2 500 chete.
Zvisinei nekuti Dhumukwa akamboedza kuvhika mhosva iyi achiti akanga akabatiswa midziyo iyi nemumhan’ari sezvo aine chikwereti naye, dare rakamubata nemhosva zvichitevera umboo hwaimuroverera.
