Kwayedza
Muhamed Komboni
MURUME anogara kuGuvarekipi, kuChisumbanje, anonzi akawanikwa akafa pedyo nerwizi rwaSave mushure mekunge arohwa zvakaipisisa nevamwe varume vaviri vachimupomera kuba mbudzi ina.
Mutauriri wemapurisa kudunhu reManicaland Assistant, Inspector Tavhiringwa Kakohwa, vanotsinhira nezvenyaya iyi.
Vanoti nomusi wa17 Kurume gore rino, mushakabvu Richard Sithole (26) ainwa doro rainge rabikwa pane mumwe musha uri mubhuku mavo neshamwari yake, Edgar.
Mushure menguva pfupi, varume vaviri – Simon Tenda (32) and Joseph Tenda (32) – vakabva vasvika paiva naSithole naEdgar ndokutanga kunetsana navo vachivapomera mhosva yekuba mbudzi ina.
Izvi zvakaita kuti varume ava vatadze kuwirirana sezvo Sithole naEdgar vaipokana nezvaitaurwa nevaviri ava. Nokuda kwehasha, Joseph naSimon vanonzi vakabva vasunungura tambo dzeshangu dzaSithole naEdgar ndokuvasunga mawoko ndokuenda navo kurwizi kunaSave vachivarova zvakaomarara neshamhu nezvibhakera.
Zuva rovira, Edgar anonzi akazokwanisa kupukunyuka ndokutiza pavakanga voyambuka rwizi Save achisiya Sithole ari mumawoko evaviri ava.
Mutumbi waSithole wakazowanikwa uri kumahombe-kombe merwizi uine mbonje dzairatidza kuti akarohwa ndokuzoendeswa kuSt Peter’s Hospital kunoongororwa nemachiremba.
Nyaya iyi yakazomhan’arwa kumapurisa avo vari kutsvaga Simon naJoseph nemaziso matsvuku.
Asst Insp Kakohwa vanoti semapurisa, havakurudzire vanhu kuti vaite mhirizhonga sezvo zvichizoita kuti vagume vapondana kana kuzvipinza mudzimwe nyatwa.
