Kwayedza
Muhamed Komboni
MURUME wekuDangamvura, kwaMutare, akamiswa mudare reko achipomerwa mhosva yekurikita muroja wake mushure mekunge atadza kubhadhara mari yerendi iri musvo asi kuti neEcoCash.
Brighton Chipinge akabvuma mhosva iyi paakamiswa pamberi pemutongi Tendai Prisca Manhibi wedare reMutare Magistrate Court.
Muchuchisi Perseverance Masukuto akaudza dare kuti Chipinge akarova Evelin Mukahlera mushure mekunge atadza kubhadhara rendi nemari yemusvo asi ndokumubhadhara neEcoCash izvo zvisina kumufadza.
“Makahlera anoti aisakwanisa kuwana ‘cash’ sezvo aibhadhara neEcoCash inova ndiyo yaaiwana. Izvi zvakaita kuti pamuke chimoto pakati pevaviri ava zvikazoita kuti Chipinge azvambaradze kurova Makahlera nekuda kwenyaya iyi.
“Chipinge anonzi akazoenderera mberi nekutora chikafu chaMakahlera chinosanganisira 20kg yehupfu, 4 litres yemafuta ekubikisa nesipo nhatu dzekuwachisa,” anodaro muchuchisi Masukuto.
Makahlera akazomhan’ara nyaya iyi kumapurisa epaMutare Central Police Station zvikaita kuti Chipinge asungwe.
Achipawo divi rake mudare, Chipinge anoti akarova nyakumhan’ara uyu sezvo vakanga vatadza kunzwanana nenyaya yekubhadhara mari yerendi.
“Chakaita kuti ndirove muroja wangu inyaya yekuti takatadza kunzwanana nenyaya yemari yerendi. Ini ndipo pandakazomurova uyezve taisibika tose nanyakumhan’ara uyu,” anodaro Chipinge.
Nyaya iyi ichiri kuenderera mberi nekutongwa mudare iri.
