Aponderwa kuparidza parufu

20 May, 2022 - 17:05 0 Views
Aponderwa kuparidza parufu

Kwayedza

Kingstone Mapupu

MURUME wemakore 37 okuberekwa wekwaMambo Chireya kuGokwe anonzi akabaiwa nebanga ndokufa mushure mekunge atsiura varume vaviri vanova mukoma nemunin’ina kuti sei vainwa doro parufu apo aiparidza nevamwe vake.

Inspector Emmanuel Mahoko, avo vanova mutauriri wemapurisa kuMidlands, vanoti nyaya iyi yakaitika masikati emusi wa15 Chivabvu.

“Nemusi uyu, Tapiwa Ziyambi (37) aiva nevanin’ina vake vanoti Teererai (32) naShepherd Ziyambi (35) vose vanobva kwaSadunhu Makore kwaMambo Chireya kwaNembudziya apo vaiparidza parufu mumusha uyu. Tapiwa Ziyambi akazoona Leon Muringi naPrichard Muringi vanova mukoma nemunin’ina vemumusha uyu vachinwa doro achibva avatsiura avo vasina kufadzwa nazvo,” vanodaro Insp Mahoko.

Mushure mekunge nhamo iyi yapera, vatatu ava vanonzi vakabvapo vave kuenda kumba kwavo vachibva vasangana naLeon naPrichard vachifamba nemugwagwa wekudimbudzira ndokutanga kutaudzana.

“Vaviri ava vakabvunza Tapiwa Ziyambi nevakoma vake nekuda kwenyaya yekuti vainge vabvunzirwa chii nezvekunwa doro parufu apa. Vaiva vakapakata zvombo zvakapinza, Leon Muringi anonzi akabva abaya Teererai Ziyambi apo Tapiwa Ziyambi akaedza kurandutsira mumwe wake.

“Prichard Muringi anonzi akabva abayawo Tapiwa Ziyambi achibva angofira panzvimbo,” vanodaro Insp Mahoko.
Vanoti Leon anonzi akabayawo Shepherd nebanga kakawanda achibva akuvara zvikuru.

Leon naPrichard vakabva vatiza mushure mekupara mhosva iyi.

“Nyaya iyi yakazosvitswa kumapurisa avo vakaenda ndokunoona mutumbi waTapiwa Ziyambi uri mukati medivi reropa uchibva waendeswa kumochari yechipatara cheGokwe. Teererai naShepherd Ziyambi vakaendeswawo kuchipatara chimwe chete ichi uko vari kurapwa uye upenyu hwavo huri parumanzombe,” vanodaro.

Mapurisa vari kukumbira kuruzhinji kuti vabatsire mukusungwa kwaLeon naPrichard nekuda kwemhosva dzavari kupomerwa.

“Vanoziva kuna Leon naPrichard Muringi ngavazivise mapurisa ari pedyo sezvo vari kutsvagwa nemhosva dzavari kupomerwa, yekuponda nekuedza kuponda,” vanodaro Insp Mahoko.

Share This:

Sponsored Links

We value your opinion! Take a moment to complete our survey