Kwayedza
Muchaneta Chimuka
CHIREVO chinoti nyadzi dzinokunda rufu chava kuzadzikiswa nenyaya yemurume wekuChitungwiza uyo akakundikana kuvimbika pabasa apo akabaUS$180 yaiunzwa nevatengi pakambani yaanoshandira inoita basa rekuveza midziyo.
Kudzai Masenda (19) wepanhamba 4271 Unit D amiswa pamberi pemutongi wedare reChitungwiza Magistrate’s Courts, Hurungudo, achitarisana nemhosva yehumbavha iyo anobvuma.
Vamupa chirango chekugara mujeri kwemwedzi misere uye vazomubvisira mwedzi miviri pachirango ichi nechitsidzo chekuti haafaniri kupara imwe mhosva yerudzi urwu makore mashanu asati apfuura.
Vasendeka padivi zvekare mwedzi miviri nechitsidzo chekuti anofanira kudzorera mumhan’ari mari yake yose iri US$180.
Kuchizoti mwedzi mina yange yasara, vamuti anofondoka kwemaawa 180 paDudzai Primary School, kuChitungwiza kwekare.
Muchuchusi VaMunyaradzi Chisvo vaudza dare kuti nemusi wa29 Zvita gore rapera – Masenda – uyo akanga ari kushandira mumhan’ari Forgive Chimbaninga (38) pakambani yeHolly Dream Furniture iri kuUnit L, kuChitungwiza, aiita katsika kekutora mari yaibhadharwa nevatengi vaida midziyo yavaitengesa achishandisa nenzira yaanoda izvo zvakaona kambani iyi ichirasikirwa neUS$180.
Chimbaninga audza dare kuti akazoziva nezvegure iri mushure mekunge afonerwa naMasenda achimutaurira kuti akashandisa mari yaakapihwa nekasitoma yainge yatenga wadhiropu.
“Masenga akandifonera achiti mudhara ndinokumbira kuti mundiregererewo ndashandisa mari yenyu yandapihwa nekasitoma yakatenga wadhiropu yange iri kubhadhara mari yacho pashoma nepashoma saka ndinokumbira kuti musandipe peyi kwemwedzi mitanhatu. Ndakashamiswa nazvo, ndipo pandakatanga kuita ongororo apo ndakange ndava kuona makasitoma akawanda aiuya achiti ainge auya kuzopedzisa kubhadhara midziyo yavo asi ini ndainge ndisina kutambidzwa mari dzacho dzekutanga.
“Pese apa, Masenda akanga ari kushandisa mari dzaaipihwa pashoma pashoma,” anodaro Chimbaninga.
