Kwayedza
Liberty Dube
MUKADZI anotengesa mubhawa kuChimanimani anonzi upenyu hwake huri panjodzi mushure mekubaiwa nebanga nemumwe murume zvichitevera gakava reUS$1 nemusi weMugovera wadarika.
Asther Manyange Uzizo (22) akasara aine maronda akadzika apo anonzi akabaiwa nebanga paruwoko rwekurudyi uye kamwe pachipfuva naPaul Masaiti.
Vakafanobata chigaro chemutauriri wemapurisa kudunhu reManicaland, Assistant Inspector Wiseman Chinyoka, vanotsinhira nyaya iyi vachiti yakaitika paNgangu Business Centre.
“Masaiti akaenda kubhawa kunotenga quart rake redoro iro raitengeswa neUS$1,50. Akapa US$5,50 kuna Uzizo ndokudzorerwa chenji yeUS$3, asi iye aitarisira kudzorerwa US$4.
“Pakaita bopoto pakati pevaviri ava. Masaiti anonzi akaenda panze ndokudzoka akabata banga reOkapi. Anonzi akabaya Uzizo kamwe paruwoko rwerudyi ndokumubaya zvekare kuruboshwe nepachipfuva.
“Akaita maronda akadzika. Masaiti akabva asungwa achangobva kupara mhosva iyi,” vanodaro Assistant Inspector Chinyoka.
