Abel Ndooka
KUNOTSVA demo kugosara mupinyi svondo rino apo zvikwata zvinokwikwidza muCastle Premiership zvichatatsurana zvichirwira mukombe wePremier Soccer League uye mutambo mukuru uchaona Dynamos FC iri pamusha payo kuRufaro Stadium ichitamba neBikita Minerals nemusi weSvondo.
Bikita Minerals, iyo iri kurairidzwa naArnold Jani, kubvira kupinda kwayakaita muPSL mwaka uno, iri kutamba nhabvu inonwisa mvura nekudaro vakomana vaGenesis Mangombe vanofanirwa kutokunya dzisimbe mumutambo wavakatarisana nawo uyu.
Mumitambo 19 yayatamba, Bikita Minerals yakwanisa kuhwina mishanu, ndokuita mangange misere uye ikakundwa mitanhatu.
Arnold Jani
Chikwata ichi chine mukana mukuru wekuti chinogona kuramba chiri muPSL mwaka unotevera kana zvichienzaniswa nezvimwe zvakaita seArenel Movers iyo yakapinda muPSL mwaka uno asi ndokuhwina mutambo mumwechete.
Ngezi Platinum Stars iri kunanga kuSakubva, kwaMutare uko ichanosangana neManica Diamonds nemusi weSvondo.
Manica Diamonds yange ichitungamira zvikuru palogo mwaka uno asi mitambo yayo yadarika yakaona chikwata ichi chichidzikira mumatambiro acho zvekusvika kugara pechina palogo parizvino.
Ngezi Platinum Stars, iyo isina kutanga zvinogutsa mwaka uno, yave kutamba nhabvu inodakadza sezvo yasimukira zvakanyanya kusvika pakugara pechipiri palogo apo iri kutevera FC Platinum.
Norman Mapeza
FC Platinum, iyo yaimbove shasha yePSL, ichange iri pamusha kuMandava Stadium apo ichasangana neHerentals College musi weSvondo.
Vakomana vaNorman Mapeza ava vari kurwisa kuti vadzore mukombe wavo wePSL uyo vakabvutirwa gore radarika neNgezi Platinum Stars.
Svondo rino, Pure Platinum Play iri kusangana neHerentals iyo yakakunda CAPS United 1-0 svondo radarika.
