Tendai Gukutikwa ari kuCHIMANIMANI
SANGANO reApostolic Christian Council of Zimbabwe (ACCZ) iro rinomirira machechi echipositori riri kuongorora nyaya yabishop wekuChimaninani uyo ari kupomerwa mhosva yekuvharira mwanakomana wake akaremara mumba kwemakore maviri achimunyima chikafu uye kumushandisa kuburikidza nemishonga yekuromba kuti awane masimba muchinamato chake.
ACCZ inoti ichatora matanho akasimba kunaNamatai Nemaramba, uyo asiri kuzivikanwa kwaari zvichitevera kubuda pachena kwenyaya iyi.
Murume uyu ndibishop wechechi yeZion Sabbath Christian Church.
Vanamati vemuchechi iyi vanoti Nemaramba anofanirwa kusiya chigaro chehubishop nekuda kwenyaya yaari kupomerwa yekushereketera mwanakomana wake, Joseph Nemaramba (21), uye kumukiira mumba kwemakore maviri.
Muhurukuro, munyori weACCZ, VaPedius Sikisa, vanoti vachiri kupedzisa kuongorora nyaya iyi.
Joseph akawanikwa ari panguva yakaoma atova nekwashi nemaronda mumuviri sezvo aigara akakiirwa mumba nababa vake.
Haachakwanisi kufamba kana kutaura, sekutaura kwaMambo Saurombe vemunzvimbo iyi.
VaSikisa vanoti vachaita nhaurwa nevose vane ruzivo maringe nenyaya iyi nemusi wa30 Gunyana.
“Nyaya iyi tichiri kuinzvera, tichasangana nevane ruzivo nezvayo nemusi wa30 Gunyana vanosanganisira masabhuku, mhuri yacho nevanhu vemunharaunda,” vanodaro.
Vanoti vakatombosangana naNemaramba nemadzishe maviri vakaita hurukuro nezvenyaya iyi.
Mambo Saurombe vanoti Nemaramba ari kutotsvagwa uye pane fungidziro yekuti akatizira kuBirchenough Bridge.
“Tinofungira kuti akatizira kuBirchenough Bridge nekuti takaenda kumba kwake nemusi weSvondo kuti tiuchenure akanzi haapo. Takaedza kumutsvaka kuti tiite chivanhu ichi kuti mwana apone asi takamushaya zvachose,” vanodaro.
Mambo Saurombe vanoti vane fungidziro yekuti pakati pehama dzaNemaramba pane mumwe waari kugara achitaura naye achimunyevera kuti atize asasungwe.
“Takanzwa kuti mumhuri mavo mune mumwe munhu ari kumupa mashoko kuti atize asi tinoziva kuti achabatwa zvake,” vanodaro.
Nemaramba aifanira kumiswa pamberi pedare raMambo Saurombe nemusi weSvondo wadarika as nhume yakasvika kumba kwake ikamushaya.
Paakamiswa mudare kekutanga, anonzi akabvuma kuti akakanganisira mwana wake nekumuvharira achigara pake oga.
Anonzi aivharira mwanakomana wake mumba semhiko yemishonga yekuti awane masimba pachinamato chake uye kuti kuchechi kwake kuuye gurumwandira revanhu.
Nemaramba anonziwo akaburitsa pachena mishonga nezvimwe zvinhu zvaanoshandisa muhurombwa hwake ndokuzvipa kudare iri.
