Kwayedza
Munyori weKwayedza
NEDONZVO rekusimudzira mabasa ekurima munyika, Hurumende iri kuwanisa varimi vanokwana 100 000 zvekurimisa mudunhu reBulawayo pasi pechirongwa chePfumvudza/Intwasa mumwaka wa2022/23.
Nerimwewo divi, vamwe varimi 32 000 kuBulawayo vachawaniswa huku muchirongwa chePresidential Rural Poultry Scheme.
Varimi vekuBulawayo vanosvika 1 000 vakapihwa hukwana 10 000 pakaparurwa chirongwa ichi svondo rapera kuMazwi Hall kuWard 17 iri kuKhami uko mhuri yoga-yoga yakawana hukwana gumi.
Varimi 240 vakarima minda yavo kare vakawaniswawo mbeu nefetiraiza muchirongwa chePfumvudza.
Murimi woga-woga akawana 2kgs yembeu yechibage kana yemapfunde uyewo varimi vatatu vachigovana 50kgs yefetiraiza yepamusoro.
Hurumende iri kutarisira goho rematani anosvika 3 miriyoni echibage mumwaka wa2022/23 izvo zvinoenderana nechirongwa chekusimudzira budiriro yenyika cheNational Development Strategy 1 (NDS1).
Zimbabwe inoda matani 2,2 miriyoni echibage pagore kuti ange achikwanirana nezvinodiwa zvichireva kuti goho rematani 3 miriyoni rinotoraudzira.
Vachiparura chirongwa chePresidential Rural Poultry Scheme, gurokota reHurumende rinomirira dunhu reBulawayo, Cde Judith Ncube, vanoti chichabatsira vagari vekumaruwa pamwe nekumadhorobha.
Vagari vekuWard 17 kuKhami pakuparurwa kwechirongwa chePresidential Rural Poultry Scheme nePresidential Input Schemes paNew Mazwi Hall svondo rapera – Mufananidzo naMaita Zizhou
“Tine varimi vari mumaguta nemumadhorobha vane nzvimbo dzinovapa mikana yekupfuya huku kana kurima. Dunhu redu reBulawayo rakapihwa hukwana 32 000. Chirongwa ichi chichaona mhuri dzinosvika 3 miriyoni dzichipihwa huku kwemakore mashanu anotevera munyika yose,” vanodaro Cde Ncube.
Mhando dzehuku dzechivanhu dziri kupihwa varimi dzinosanganisira Boschvelds, Sasso neKuroiler.
Cde Ncube vanoti chirongwa ichi chakanangana nekuwanisa mhuri 3 miriyoni hukwana dzechivanhu dzinosvika 30 miriyoni munyika yose.
Vanokurudzira varimi kushanda nenyanzvi dzakadai sedzekubazi reDepartemnt of Veterinary Services (DVS) nevamwe kuti basa iri ribudirire.
