Kwayedza
Munyori weKwayedza
ZVICHITEVERA kupinda musemi-final yeChibuku Super Cup, Herentals ine zviroto zvekumirira Zimbabwe mumitambo yemuAfrica kuburikidza nekuhwina mukombe uyu.
Herentals yakakunda Manica Diamond muquarter-final mutambo uyu wave kunopera kunhandare yeNational Sports Stadium neMugovera svondo radarika.
MaStudents, sezita remadunhurirwa reHerentals, vave kutarisira kusangana neFC Platinum iyo ine mukombe uyu musem-final ichatambwa nemusi wa15 Gumiguru.Murairidzi weHerentals, Kumbirai Mutiwekuziva, anoti kunyangwe zvazvo FC Platinum iri kutarisirwa kuhwina mukombe uyu, ivo vane zvishuvo zvavo zvavari kutarisirawo.
Sezvo mukombe wePSL vasisakwanise kuuhwina, anoti kutora mukombe weChibuku Super Cup ndiyo yoga nzira yekumiririra Zimbabwe mumitambo yemuAfrica.
Chikwata chichahwina mukombe weChibuku Super Cup chichabva chawana tikiti rekumirira Zimbabwe mumutambo weCAF Confederation Cup.
“Tiri kutarisira kuve chikwata chikuru saka iyi ndiyo imwe nzira yacho takatarisa kwatiri kunanga.
“Chinhu chikuru kuchikwata nekudaro tinotarisira kuramba tichikura uye tigosvika padanho rekuve chikwata chikuru munhabvu,” anodaro.
“Mutambo uyu wakakosha uye ndiyo nzira yekutamba mumitambo yemuAfrica. Izvi zvinodiwa nemunhu wose kutamba mitambo yeAfrican Safari saka tikashanda nesimba zvinokwanisika.”
FC Platinum, iyo yakakunda Dynamos 4-2 kumapena, ndiyo iri kutarisirwa neveruzhinji kuhwina mukombe uyu pazvikwata zvina zvasara.
Mumwe mutambo wesemi-final uchaona Black Rhinos ichisangana neBulawayo Chiefs.
