Abel Ndooka
MUTAMBI weHighlanders FC – Lynoth Chikuhwa – ndiye ari kutungamira pakunwisa uye pakurwira mubairo mukuru wePremier Soccer League Golden Boot zvichitevera kunwisa kwaaita ka15 mwaka uno achidarika vamwe vose kusvika parizvino.
Maziso ese achange akatarisa kuti ndiani achahwina mubairo wegolden boot uyu sezvo pasara mitambo miviri kuti mwaka we2024 Castle Premiership uchipera.
Kwenguva ndefu, vatambi vaviri vanoti William Manondo weCAPS United naKhama Billiat weYadah Stars ndivo vange vachitungamira vachirwira mubairo uyu.
Asi Chikuhwa akazomuka chibhebhenenga mumitambo yadarika ndokudarika vese.
Manondo naBalliat vari kufemera zvavo mugotsi maChikuhwa sezvo vatambi vaviri ava vakwanisa kunwisa ka12 (kusvika nemusi wa5 Mbudzi pakaburitswa nyaya ino) vakasiiwa nezvibodzwa zvitatu naChikuhwa.
William Manondo
Chikuhwa akaenda pamberi paManondo naBilliat svondo radarika zvichitevera kunwisa katatu (hat-trick) kwaakaita apo Bosso yakatamba neGreenfuel kuBabourfields Stadium, kuBulawayo.
Mumitambo yasara iyi, maziso ese achange ari panaChikuhwa sezvo vatsigiri vazhinji vachida kuona kuti anokwanisa kunwisa kanodarika ka20 here mumwaka mumwechete izvo zvakapedzisira kuitwa namushakabvu Norman Maroto uyo akanwisa ka22 apo aitambira Gunners muna2010.
Kubva ipapo, hapana kuzomboita zvekare mumwe mutambi wenhabvu akanwisa ka20 mumwaka mumwechete.
Asi vamwe vatambi vanoti Nelson Mazivisa naTendai Ndoro vakapotsa nepadiki mumakore anoti 2012 na2013 apo vakapedza vanwisa ka18.
Khama Billiat
Mumwaka wa2022 — William Manondo — uyo ari kukwikwidzana naChikuhwa, akanwisa ka17 ndokuhwina mubairo wegolden boot.
Izvi zvinoreva kuti mumitambo yake inotevera anotofanirwa kunwisa zvemberi kana achida kuhwina mubairo uyu kechipiri.
Vamwe vatambi vari kurwira mubairo wegolden boot mwaka uno vanosanganisira Takunda Benhura weNgezi Platinum Stars uyo anwisa ka11 naTymon Machope weSimba Bhora anwisawo ka11 zvekare mwaka uno.
