Kwayedza
Abel Ndooka
SANGANO reCouncil of Southern Africa Football Association rinoti mutambo weCOSAFA Cup uchatambwa muna Chivabvu gore rinouya.
Mutambo uyu waifanirwa kutambwa muna Chivabvu kuDurban, kuSouth Africa gore rino asi wakambomiswa zvichitevera kumiswa kwakaitwa mitambo pasi rose nechinangwa chekurwisa kupararira kwechirwere cheCovid-19.
Achitaura ari kuSouth Africa uko anogara, munyori mukuru weCOSAFA, Sue Destombes — anoti gore rino hazvichakwanisika kuti Cosafa Cup ichiitwa.
“Gore rino hazvichakwanisika kuti Cosafa Cup yevarume ichitambwa, asi ticharonga kuti igotambwe gore rinotevera muna Chivabvu,” anodaro Destombes.
Kunyangwe zvazvo mutambo wevarume usiri kuzotambwa gore rino, Destombes anoti mitambo mina yemadzimai iriko gore rino.
“Tiri kuronga mitambo mina inoti yeCosafa Cup yemadzimai vakuru neUnder-17 kozoti maUnder-17 ne20 vachatamba mitambo yekurwira kuenda kuAFCON 2021,” anodaro.
Kumitambo yevarume, Zambia ndiyo ine mukombe weCosafa Cup uyo wayakahwina gore rapera.
Zvakadaro, chikwata chemaMighty Warriors chiri kuPort Elizabeth, kuSouth Africa uko chiri kukwikwidza mumutambo weWomen’s COSAFA Cup Tournament. Chikwata ichi chiri muboka rine zvimwe zvinoti Tanzania neBotswana muGroup C.
Chikwata chinopedza chiri pamusoro muboka iri chinobva chananga kusemi-fainari yemutambo uyu.
Mitambo yezvimwe zvikwata zvinosanganisira Under-17 ichatanga musi wa19 Mbudzi uye ichitarisirwa kuzopera musi wa29 Mbudzi. Kozoti yeUnder-20, ichatambwa kutanga nemusi wa3 Zvita ichizopera 13 Zvita.
