Kwayedza
Munyori weKwayedza
VASHANDI vaviri vekambani yeSmart Express Bus Company iri maMutare — iyo muridzi wayo anove VaCharles Makosi — vanonzi svondo rapera vakarohwa nehana mushure mekunge vaona marangwanda nedehenya remusoro wemunhu apo vaichera muchivanze chamuzvinhabhizimisi uyu kunzvimbo yePalmerstone.
Mutauriri wemapurisa kudunhu reManicaland, Inspector Tavhiringwa Kakohwa, vanotsinhira nyaya iyi.
Vanoti VaDouglas Marezu (39), mushandi wepamba wamuzvinhabhizimisi uyu, vakachera ndokufukunura mapfupa maviri emunhu nemusi wa17 Gumiguru.
Vanonzi vakabva vaudza vamwe vashandi vepamba apa nezvechiitiko ichi asi vose vakangofunga kuti mapfupa aya aive emhuka.
Insp Kakohwa vanoti zuva rakatevera nenguva dzemasikati, mumwe mushandi wepamba apa, VaPeacemaker Muzvova (18), aichera pachivanze apo akafukunura zvakare dehenya remusoro wemunhu vachibvisa ivhu panzvimbo imwechete yakange yamboonekwa mapfupa maviri aye.
“Vakabva vaudza VaLican Mukwamba (62) avo vaivaka pamba apa. VaMukwamba vakaudzawo munin’ina waVaMakosi — Norman — nezvenyaya iyi,” vanodaro Insp Kakohwa.
Nemusi wa19, Norman akaenda kukanzuru yeMutare achinomhan’ara nyaya iyi asi ndokuudzwa kuti aende kumapurisa.
Akabva adarikira kunomhan’ara paMutare Central Police Station zvikaita kuti matikitivha aende pamba apa ndokutanga kuferefeta.
Ongororo yemapurisa inoratidza kuti dehenya remusoro wemunhu iri — iro raive nemazino gumi — nemapfupa maviri zvakafukunurwa izvi zvainge zvotowora.
