Abel Ndooka
ZVIKWATA zvenhabvu zvine mukurumbira zvinoti Ngezi Platinum Stars neDynamos FC svondo rino zvichamirira Zimbabwe mumitambo mikuru yemuAfrica.
Ngezi, iyo yakahwina mukombe wePremier Soccer League mwaka wadarika, iri kutamba muCAF Champions League 1st Preliminary Round.
Izvi zvichaiona ichisangana neAS Maniema Union yekuDemocratic Republic of Congo (DRC).
Nerimwe divi, Dynamos FC ichatambawo muCAF Confederations Cup 1st Preliminary Round apo ichisangana neZESCO United yekuZambia.
Nekuda kwekuti muZimbabwe parizvino hamuna nhandare dzinotenderwa kutambirwa mitambo yeFIFA neCAF, mitambo yezvikwata zviviri izvi yese ichatambirwa kunze kwenyika.
Mutambo weNgezi Platinum Stars neAS Maniema Union uchatambirwa kunhandare yeNational Heroes Stadium kuLusaka kuZambia musi weMugovera, kuchiti weDeMbare neZESCO United uchatambirwa kunhandare yeBotswana National Stadium kuGaborone kuBotswana musi weSvondo.
Aka kachange kari kekutanga keNgezi Platinum Stars kukwikwidza mumitambo yemuAfrica zvichitevera kuhwina kwayakaita mukombe wePSL gore radarika.
DeMbare iri kudzokawo mushure mekupedza makore akawanda isina kumbotamba mumutambo uyu.
Dynamos, iyo parizvino iri kurairidzwa naLloyd Chigowe, yakapedzisira kukwikwidza mumitambo yemuAfrica mugore ra2014 apo yakatamba muCAF Champions League asi haina kuzosvika kure sezvo yakaburitswa muround rechipiri neAS Vita yekuDRC.
Mupreliminary round, DeMbare yakasangana neMochudi Centre Chiefs yekuBotswana iyo yakakunda 3-1 paagregate.
Murairidzi weNgezi Platinum Stars (Madamburo) – Takesure Chiragwi – anoti kutambira kuZambia hakubatsire chikwata chake sezvo anoda kuona vachitambira pamusha pavo.
Takesure Chiragwi
“Hazvina kutimirira zvakanaka kutambira kunze nekuti kana muchitambira muno munenge mune vatsigiri vanobva kumapurovhinzi ese nekuti muri kumirira nyika. Asi kana iri nyaya yekutamba, tinongotamba hatifanire kuchema nekuti munhabvu munotambira kunhandare dzakasiyana.
“Ndinofunga kuti tinofanirwa kusimba chaizvo uye tinovimba zvizvarwa zveZimbabwe zviriko ikoko vachauya nehuzhinji hwavo kuzotitsigira nekuti mutsigiri (12th man) anobatsira mukusimbisa vatambi kuti vahwine mitambo yavo nekutamba vakasununguka,” anodaro Chiragwi.
Ngezi ichipedza kusangana neAS Maniema Union, ichabva yatanga gadziriro dzekuenda kuDRC uko ichanosangana nechikwata ichi mumutambo wechipiri. Kana ikabudirira kuhwina mitambo yese miviri ye1st preliminary round, inobva yafambira mberi kuenda apo inenge yakamirirwa neAtletico Petroleos de Luanda yekuAngola.
Kana ikazobudirira zvekare kukunda Atletico Petroleos de Luanda inobva yapinda mumaboka emutambo uyu (group stages) ayo achazoumbwa mumasvondo anotevera panopera mitambo yepreliminary round.
Kuchiti DeMbare ikakwanisa kukunda ZESCO United mumitambo miviri yayakatarisana nayo, ichange yakamirirwa nechikwata chichazohwina pamutambo weForesters Mont Fleuri yekuSychelles neOrapa United yekuBotswana.
