Kwayedza
Kingstone Mapupu
VANOMIRIRA Buhera South mudare reHouse of Assembly, Cde Joseph Chinotimba, vari kukurudzira vabereki vane vanasikana vachiri kuenda kuchikoro avo vakaitiswa pamuviri panguva yelockdown iyo yakakonzerwa nekuvepo kwechirwere cheCovid-19 kuti vasagare navo kudzimba, asi kuti vabude pachena nedonzvo rekuti vaenderere mberi nefundo yavo.
Pasi pemutemo weEducation Amendment Act, vana vanoita pamuviri vachiri pachikoro vane kodzero yekuenderera mberi nedzidzo.
Kurudziro yaCde Chinotimba inotevera nyaya dzevanasikana vane chitsama avo vanonzi vakamitiswa panguva yakavharwa zvikoro senzira yekurwisa kupararira kwechirwere cheCovid-19 zvikaita kuti vamwe vavo vapedzisire vasisaende kuchikoro.
“Denda reCovid-19 raunza matambudziko akawanda munyika, kusanganisira muzvikoro zvedu. Mudunhu reBuhera South tine zvikoro 22 zvesekondari koita 48 zvepuraimari. Muzvikoro izvi kune vana vakaita pamuviri avo vamwe vacho vatova nevana, vamwewo vakazvitakura,” vanodaro Cde Chinotimba.
Vanoti dambudziko riripo nderekuti kune vabereki vari kuviga vana ava mudzimba kana kuvatamisa vachivaendesa kuhama dziri kure nekuda kwekunyara kuti vasaonekwe neveruzhinji munharaunda dzavanogara kana kuti kuvigiridza mhosva sezvo nyaya dzerudzi urwu dziine kumbunyikidzwa kwevana mukati.
“Dambudziko rakadai riri kuwanikwa kumatunhu ose enyika, revanasikana vachiri kuenda kuchikoro asi vakaita pamiviri panguva dzelockdown avo vagere kudzimba. Tinotenda Hurumende nekuti yakanyevenutsa mitemo kuti vana ava vabvumirwe kuenderera mberi nechikoro vaine mimba kudaro. Saka vabereki ngavazive mitemo iyi vadzosere vana kuchikoro uye vorega kuvaviga kudzimba,” vanodaro Cde Chinotimba.
Vanoti vari kufamba nechikwata chavo mudunhu reBuhera South vachipa vabereki chenjedzo pamusoro penyaya iyi.
“Tiri kuita misangano nemasabhuku, madzimambo nevamwe vatungamiri vemuBuhera South kusanganisira nevakuru vezvikoro kuti vaburitse nyaya dzakadai kuti tikwanise kubatsira vanasikana ava,” vanodaro.
Cde Chinotimba vanoti vachiri pakati pekutsvaga huwandu hwevana vakaita pamiviri mudunhu ravo panguva yelockdown nechinangwa chekuti vavabatsire vadzokere kuchikoro.
“Tine vamwe vana vatiri kubatsira kare vane pamiviri, register remazita evanasikana vose vakavhiringidzwa panguva iyi vakapihwa mimba uye vamwe vakatoita vana riri kugadzirwa. Tiri kubatsira mune zvakasiyana zvinosanganisira vana vacho vari kuberekwa uyewo vane pamiviri tiri kutengawo zvinodiwa nekuvasonera mayunifomu emateneti erudzi rwekuzvikoro zvavanopinda.”
Cde Chinbotimba vanoti vari kushandisa kambani yavo yekusona inowanikwa kwaMushongwi, kwakare kuBuhera, kusona mayunifomu aya pamwe chete nemamasiki.
“Mwanasikana wose akaita pamuviri ari pachikoro tiri kumusonera mateneti ake matatu ejira reyunifomu yekuchikoro chaanopinda. Hazvireve kuti tiri kukurudzira kuitwa kwepamiviri nevana, asi kuti tinoziva kuti itsaona saka munhu asangana netsaona anobatsirwa,” vanodaro.
Vanoenderera mberi vachiti, “Vana vazhinji vandakanzwa kuti vakaitiswa pamiviri ndevekusekondari kubvira Form 1 kusvika Form 6.”
Cde Chinotimba vanoti vari kuvandudzawo zvikoro zvemudunhu ravo kuburikidza nekuzvipendesa uye kuisa matenga zvimwe zvakatorwa nemhepo yaiva nedutu guru nguva pfupi yakadarika.
“Zvikoro zvandiri kuvandudza zvinosanganisira Nyadi Primary nesekondari uye Mushongwi Primary nesekondari. Nyaya huru yandinochema nayo kuti zvikoro zvine Form 6 zviwande sezvo tichingova neDevure Secondary, Muzokomba Secondary, Chapanduka Secondary nezvimwe zvishoma izvo zvinosvika zvisere chete mudunhu rose,” vanodaro Cde Chinotimba.
