Gadhi orikita ‘girlfriend’ netsvimbo yebasa

04 Oct, 2022 - 14:10 0 Views
Gadhi orikita ‘girlfriend’ netsvimbo yebasa

Kwayedza

Mashudu Mambo

MURUME anoshanda semurindi kuBulawayo akarova musikana wake netsvimbo yebasa (baton tsick) muviri wose sechirango chekudzima mifananidzo yake munhare yake.

Izvi zvakanzwikwa apo Takaindisa Chirimo akamira pamberi pemutongi wedare reBulawayo Magistrate Court, VaBusani Sibanda, achipomerwa mhosva yekurova sezvinotsanangurwa muchikamu cheSection 3 (1) (a) nechikamu 4 chemutemo weDomestic Violence Act Chapter 5:16.
Chirimo, uyo ari kuramba mhosva iyi, achange ari mutirongo kusvika musi wa12 Gumiguru apo nyaya yake ichaenderera mberi nekutongwa.

Paakabvunzwa nemutongi kuti sei akashandisa tsvimbo kurova musikana wake, Chirimo akaramba mhosva iyi achiti akamurova nezvibhakera.

Dare rakanzwa kuti nemusi wa25 Gunyana gore rino nenguva dza7 manheru, Chirimo anonzi akarova musikana wake, Chipo Rukweshe, wekuHarrisvale netsvimbo muviri wake wose mushure mekusanzwisisana.

Kusanzwisisana uku kwakamuka mushure mekunge Rukweshe adzima mifananidzo yake munhare yaChirimo. Zvinonzi Chirimo akarova mudiwa wake izvo zvakaita kuti akuvare zvakaipisisa achibva aendeswa kuchipatara kunorapwa.

Nyaya iyi yakamhan’arwa kumapurisa zvikazoita kuti Chirimo asungwe. Mune imwe nyaya, murume ane makore 61 ekuberekwa wemumusha weKillarney muBulawayo akamiswa pamberi pemutongi mumwe chete uyu akatarisana nemhosva yekuba bhara remumwe murume akange atadza kumubhadhara mari yebasa raainge ashanda pamba pake.

Lovemore Ndiweni, uyo akabvuma mhosva yekuba, akatongerwa kugara mujeri kwemwedzi mina iyo yakazosendekwa parutivi nechitsiidzo chekuti haapare imwe mhosva yerudzi urwu mukati memakore mashanu.

Dare rakaudzwa kuti nemusi wa23 Nyamavhuvhu gore rino, Ndiweni akaenda kumba kwaTinotenda Mberikwazo kuKillarney kunoita basa remaricho.

Mushure mekuita basa iri, Mberikwazvo akazotadza kumubhadhara zvikaita kuti Ndiweni atore bhara rake aine chinangwa chekuzomudzosera mushure mekunge apihwa muripo wake. Mberikwazvo akabva anomhan’ara nyaya iyi kumapurisa zvikazoita kuti Ndiweni asungwe.
Bhara iri rinokosha US$60 uye rakawanikwa.

Share This:

Sponsored Links

We value your opinion! Take a moment to complete our survey