Muchaneta Chimuka
MURUME ane makore 50 okuberekwa wekuChitungwiza ozvidemba zvichitevera kusasana kwaakaita neshamwarikadzi yake iyo yakazomubira gas tank mushure mekunge aisiya irere mumba make.
Adolf Petro akabirwa gas tank rinokosha US$20 neshamwarikadzi yake, Tendai Tagarira (35), uyo anogara kuChitungwiza kwakare.
Mutongi wedare reChitungwiza Magistrate’s Courts, VaAlois Midzi, vakapa Tagarira chirango chekugara mujeri kwemazuva gumi kana kuti abhadhare faindi yeUS$30.
Pamusoro peizvi, vakamuti abhadhare US$20 yekuripira mumhan’ari gas tank rake sezvo akarirovesa.
Muchichisi Tendai Ruwocha vakaudza dare kuti nomusi wa10 Gumiguru gore rino, Petro akasiya shamwarikadzi yake iyi irere mumba munguva dzemangwanani.
Paakazodzoka manheru, ndipo paakashamisika kuwana Tagarira asipo uye gas tank rake rakange risimo mumba zvakare zvakaita kuti azomhan’ara nyaya iyi kumapurisa.
“Zvakaitika ndezvekuti ndakamuka ndichibva ndasiya shamwarikadzi yangu irere mumba ndichienda kuUnit M kunotora yunifomu yemwana wangu yekuchikoro saka pandakadzoka ndipo pandakawana gas tank rangu rabiwa uye mudzimai uyu ainge atoenda asina kuoneka,” anodaro.
Tagarira akabvuma mhosva yake pasina kundandama.
