Munyori weKwayedza
DURA renyika reGrain Marketing Board (GMB) rine chibage, gorosi nezvimwe zvinokwanirana kusvika pagoho rinotevera munaKubvumbi gore rino.
Vachitaura kuvatori venhau nemusi weChipiri chino mushure mekupera kwemusangano wedare reCabinet, gurukota rezvekuburitswa kwemashoko nenyaya dzenhepfenyuro, Dr Jenfan Muswere, vanoti GMB ine chikafu chinokwanirana chinodiwa nenharaunda dzekumaruwa kusvika pagoho rinotevera.
“Grain Marketing Board ine zvinokwanirana zvinodiwa nenharaunda dzekumaruwa kusvika pagoho rinotevera munaKubvumbi 2025.
“Matani anosvika 1 349 877 ayo anosanganisira 1 127 411 echibage, 220 092 egorosi nematani 374 efurawa yegorosi akatengwa kunze nemakambani akazvimirira kubva munaKubvumbi 2024 kusvika 2 Kukadzi, 2025,” vanodaro Dr Muswere.
Vanoti kusvika parizvino, magwaro ekupa bvumo yekutenga chibage kubva kunze anosvika 1 021 akatopihwa kuti patengwe matani 5 miriyoni.
Dr Muswere vanoti ongororo yekutanga yakaitwa maringe nezvirimwa inotaridza kuti chikamu chinosvika 99 percent chaitarisirwa kurimwa chibage mwaka uno chakabudirira kurimwa.
“Pasi pechirongwa chePresidential Input Scheme, varimi vakarima mapuroti 11.4 miriyoni kubva pa9.5 miriyoni aitarisirwa, zvinoreva kuti akaraudzira nechikamu che20 percent uye ne16 percent pamusoro zvekare kana zvichienzaniswa nemwaka wa2023/2024 apo pakarimwa mapuroti 9.8 miriyoni,” vanodaro Dr Muswere.
Mahekita akarimwa donje anosvika 203 875 ayo akawedzera nechikamu che40 percent kubva pa145 265 emwaka wadarika.
“Maringe nefodya, varimi 127 000 vakanyoresa kuti varime chirimwa ichi mumwaka wa2024/2025, izvo zvinotaridza kuwedzera nechikamu che10 percent kubva pa115 000 avo vakanyoresa mumwaka wa2023/2024.
“Pavarimi vakanyoresa (kurima fodya), chikamu che92 percent ndevemakondirakiti,” vanodaro Dr Muswere.
